- Publika iha: 10 Janeiro 2012
Komisaun Anti Korrupsaun (KAK) to ohin loron konsegues ona identifika kazus korrupsaun 27 no kazua sia tama ona iha Ministerio Publiku.
“Prosesu investigasaun lao nafatin. Deste tinan uluk to’o agora ami simu kazu ne’ebe mak delega husi Ministeriu Publiku ne’e 27 (Rua Nulu Resin Hitu) husi kazus 27 ne’e KAK halo ona investigasaun hotu ona no fo sai nia relatoriu hamutuk sia ba ministeriu Publiku,” hateten Jose Antoniu De Jesus Das Neves, Komisario Adjuntu ba Edukasaun no Peskiza, KAK.
Komisario Adjuntu Neves dehan tan katak wainhira kazus tama ona iha Ministeriu Publiku hein katak sira sei esforsu makaas no sei halo anliza ba kazu hirak ne’e hodi nune’e sei hetan rezultadu nebe apropriado, maibe wainhira Ministeriu Publiku hanoin katak kazu hirak ne’e presija tan informasaun ruma sira bele husu KAK atu buka tan informasaun atu kompleta liu tan faktus.
Iha biban seluk Dra. Angelina Saldanhia hosi Ministeriu Publiko konfirma katak KAK hatama duni Kazus Korupsaun ba iha Ministeriu Publiko no katak kazus presiza halo kontinuasaun investigasaun atu kompleta liu tan.
Dra. Saldanha haktuir tan katak kazus balun tama ona iha julgamentu no hetan ona desizaun sentensa prisaon ba arguidos no balu hetan absolvisaun tamba provas la sufisiente.
“Kazu sira ne’ebe mak agora iha ne’e Ministerio Publiko sei presiza tempu atu halo investigasaun klean liu tan para atu bele hadia liu tan lolos iha provas iha ka lae no arguido mak se’e, testemunha iha ka lae. Depois mak ita bele deside katak atu lori ba tribunal sei karik provas sufisiente. Sei karik provas la sufisiente entaun kazu ne’e sei arkivu hela iha MP,” dehan Dr.Saldanha.