- Publika iha: 17 Julho 2013
Komandante Polisia Nasional Tranzitu, Inspektor Xefe Antonio C.Soares sujere ba Ministeriu Publiku atu fo tan treinamentu ba nia membrus sira kona ba lei tranzitu nian, nune’e sira bele servisu ho efetivu liu tan.
Tuir nia, durante ne’e nia membrus balun seidauk iha konesementu diak kona ba lei tranzitu nian,liu-liu bainhira akontese asidente ne’ebe rezulta ema mate.
“Ita servisu ho lei, pur ezemplu oinsa maka prosesu atendementu ne’e to’o iha tribunal, ne’e maka husi polisia tranzitu la hatene, ne’ebe ami presiza treinamentu,” Komandante Polisia Tranzitu Nasional (POLTRANS), Inspektor Xefe Soares, iha Kaikoli, Dili.
Entretantu Prokuradoria Distrital Dili, Angelina Saldanha hateten, treinamentu lubuk ida sira fo ona ba POLTRANS maibe jeral deit.
“Espesifiku area tranzitu nian ami seidauk fo, e ami halo ona enkontru ho Adjuntu Komandante Polisia Distritu Dili nian oinsa mak bele fo treinamentu ba sira,” Prokuradoria Saldanha katak.
Tanba ne’e nia dehan, sira sei fo treinamentu espesifiku ba sira iha future, kona aba area tranzitu nian maibe depende ba orsamentu ne’ebe iha.
“Ita sei hare, tanba treinamentu ne’e presiza osan,” Prokuradoria ne’e tenik.
Iha parte seluk Deputadu Mateus de Jesus dehan, kariki ida ne’e mak sai hanesan nesesariu ida ba sira, entaun tenke toma atensaun.
“Tanba lor-loron sira halo atendementu ba kazu asidente ne’ebe maka mosu, ne’e duni wainhira sira dehan presiza hetan treinamentu husi Ministeriu Publiku, ne’e hau hanoin diak ida, atu nune’e sira bele kapasitadu liu tan,” Deputadu de Jesus apoia.