- Publika iha: 17 Julho 2013
Tribunal Distrital Dili fo pena admoestasaun deit ba arguidu Tome da Costa ne’ebe halo violensia domestika hasouru lezada Luciana da Costa ne’ebe nudar arguidu nia kaben rasik.
Tuir Defeza Arguidu, Leonido Marques katak, lolos krime ne’e fo fatin ba arguidu atu selu multa, maibe hare ba kondisaun ekonomia ne’ebe insufsiente,Tribunal Distrital Dili (TDD), fo deit pena admoestasaun.
“Arguidu nia kondisaun ekonomia fraku, la justu atu aplika multa tanba nia agrikultor. Tanba ne’e, hau husu fó pena admoestasaun, e hare ba faktus ne’ebé provadu, tribunál deside pena admoestasaun ba arguidu sein kusta judisial,” Defeza Marques dehan, iha TDD, Mandarin, Dili.
Entretantu akontesementu ne’e rasik akontese iha dia 08 Maiu 2012,iha aldeia Klak fuik, suku Becora,sub-distritu Cristo Re’i, distritu Dili, iha tuku 07:00 kalan, iha momentu ne’eba arguidu ho nervozu lori kadeira masa baku lezada nia liman to’o bubu.
“Hau baku nia tanba hau ladun gosta ho nia, wainhira nia diriji reniaun ida iha Taibesi, nia konta istoria mak barak liu,” deklara Arguido Tome da Costa, iha TDD, bainhira halo julgamentu ba sira nia kazu.
Maske nune’e, nia deklara katak, arepende ho hahalok ne’ebe nia halo hasouru lezada no promete sei repete tan iha futuru.
Iha lidun seluk, Diretor Judicial System Monitoring Program (JSMP), Luis de Oliveira Sampaio, dehan kazu sira hanesan ne’e presiza duni halo julgamentu.
"JSMP louva autór judisiáiriu sira tanbá fó prioridade atu julga kazu violénsia doméstika, ne’e hanesan pasu importante atu elimina violénsia hasoru feto iha Timor Leste," Diretór JSMP, Sampaio katak.
Enkuantu husi Ministériu Públiku (MP), akuza arguidu kontra artigu 145 Kódigo Penál kona-ba ofensas ba integridade fízika simples konjuga ho artigu 2, 3 no 35 alinea (b), Lei Kontra Violénsia Doméstika.
No Ministeriu Publik mos husu ba tribunál atu kondena arguidu, nune’e labele repete hahalok hanesan iha futuru.
Iha fatin ketak, Deputadu Inacio Moreira hateten, violensia domestika nudar aktu ne’ebe maka la diak, ne’e duni desizaun ne’ebe tribunal fo ne’e tuir duni faktus no evidensia ne’ebe maka iha.
“Tenke julga duni, tanba se la’e kestaun hanesan ne’e sei buras ba bebeik iha rai laran,” Deputadu Moreira apoia.