Quarta, Fevereiro 19, 2025

Durante tinan 2024 Servisu Migrasaun (SM) aplika prosesu kriminál ba sidadaun estranjeiru hamutuk na'in-haatnulu (40), tanba kontra Lei Migrasaun númeru 11/2017 no azilu.

Durante tinan 2024 Servisu Migrasaun (SM) aplika prosesu kriminál ba sidadaun estranjeiru hamutuk na'in-haatnulu (40), tanba kontra Lei Migrasaun númeru 11/2017 no azilu.

Diretora Jerál Servisu Migrasaun Inspetora Xefe Adelaide de Rosa hatete, iha tinan 2024 ne'e servisu Migrasaun rejistu movimentu ema tama no sai husi territóriu nasionál hamutuk 623, 739.

Nia dehan, husi total ema 623,739 hirak ne'e iha sidadaun estranjeiru hamutuk 647 mak viola lei migrasaun númeru 11/2017 no azilu, tanba utiliza vistu turista hodi halo atividade negósiu nune'e mós balun viza mate ona,maibé la prolonga no na'in-ida komete krime brankamentu kapitál.

"Husi sidadaun estranjeiru na'in 647 ne'ebé viola lei migrasaun no azilu ne'e, ita aplika prosesu kriminál ba ema hamutuk na’in 40, aplika abandona voluntáriu ba ema na’in 124 no aplika sansaun administrativu hamutuk 482, hodi fila ba nasaun orijen," Diretora SM Inspetora Xefe Rosa salienta.

Nia dehan, sidadaun estranjeiru ne'ebé mak aplika sansaun tuir lei migrasaun no azilu ne'e, bandu sei la tama teritóriu nasionál durante tinan haat (4).

Enkuantu nia dehan, dadaun ne'e SM koopera hamutuk ho autoridade adoneira hodi halo lansamentu ba pasajeiru online.

"Ita kontrola ida-ne'e ita utiliza sistema ho naran Migration Information and Data Analysis System ho Maydas," nia salienta.

Alende ne'e nia dehan, servisu migrasaun koopera ho komandante munisípiu sira hodi kontrola ema estranjeiru movimentu no utilizasaun vistu ligadu ho atividade ne'ebé sira halo.

Entretantu Deputadu António da Conceição dehan, sistema kontrolu servisu migrasaun durante ne'e di'ak tebes maibé persiza moderniza liutan.

"Presiza moderniza sistema kontrolu iha fronteira atu nune'e bele hafasil sira-nia servisu," nia dehan.

Nia dehan, presiza mós formasaun ba pesoál sira hodi deteta tranzasaun ilegál sira iha Timor-Leste.