Quarta, Fevereiro 19, 2025

Komandu Falintil-Forsa Defeza Timor-Leste (F-FDTL) apelu ba militár hotu ne’ebé ativu no la ativu atu apoiu halo identifikasaun ba bala musan sira ne'ebé mak dadaun tiru arbiru iha komunidade nia leet.

Komandu Falintil-Forsa Defeza Timor-Leste (F-FDTL) apelu ba militár hotu ne’ebé ativu no la ativu atu apoiu halo identifikasaun ba bala musan sira ne'ebé mak dadaun tiru arbiru iha komunidade nia leet.

Xefe Estadu Maiór F-FDTL Tenente Jenerál Domingos Raúl Falur Rate Laek hatete, iha Timor-Leste instituisaun tolu de'it mak kaer kilat mak hanesan, Falintil Forsa Defesa Timor-Leste (F-FDTL), Polísia Nasionál Timor-Leste (PNTL) no Polísia Sientifika Investigasaun Kriminál (PCIC) la iha tan ema seluk.

"Ha'u apela ba militár sira hotu ativu no la ativu tenke kontribui ba identifikasaun bala musan ne'ebé mak ikus-ikus ne'e tiru iha komunidade nia leet, tanba ida-ne'e ladi'ak," nia dehan.

Nia dehan, bainhira identifika iha oknun husi instituisaun tolu ne'e balun mak komete sei prosesu tuir lei ne'ebé mak iha no sei la tolera hahalok ne’e atu buras iha Timor-Leste.

Alende ne'e nia dehan, bele mós iha kilat ilegal ema bele sosa iha fatin ne'ebé de'it no lori tama mai Timor-Leste, tanba sistema kontrolu iha fronteira mós ladun seguru, maibé ita sei buka tuir, ita identifika ita sei prosesu tuir lei

“Dadaun ne'e instituisaun rua F-FDTL no PNTL iha kooperasaun hodi halo formasaun karakter ba membru seguransa forsa defesa kona-ba utiliza arma," nia dehan.

Iha parte seluk Diretór Ezekutivu Fundasaun Mahein Nelson Belo dehan, kazu tiru bala musan iha komunidade nia leet ne'e bei-beik ona.

"Komandu PNTL no F-FDTL tenke servisu hamutuk forma ekipa hodi buka tuir autór sira-ne'e mak utiliza kilat tiru arbiru hodi halo tauk komunidade," nia dehan.

Nia hatete, bainhira iha prosesu identifikasaun mak identifika autór se de'it oknum PNTL ka F-FDTL labele tolera tenke aplika sansaun disiplinar no prosesu ba krime nian atu nune'e bele responde ba hahalok krime ne'ebé nia komete.