- Publika iha: 28 Janeiro 2025
United Nation Office on Countering Terrorist Travel Programme (UNOCTTP) apoiu modernizasaun sistema jestaun kontrolu iha fronteira hodi kombate krimi trans-nasionál.
Programme Management Officer UN Countering Terrorist Travel Programe (UNOCTTP) . Vugar Allahverdiye dehan, apoiu ne'e liuhusi MoU ne'ebé asina ho Servisu Migrasaun hodi implementa programa Advance Passanger Information (API) no Passanger Name Record (PNR) hodi moderniza kontrolu iha fronteira.
"United Nation Office on Countering Terrorist Travel Program (UNOCTTP) apoiu Servisu Migrasaun hodi moderniza sistema jestaun kontrolu iha fronteira hodi prevene no deteta krimi Trans-Nasionál sira ne'ebé ultrapasa fronteira," nia dehan.
Nia dehan, objetivu moderniza sistema jestaun fronteira ne’e aliña internasionál, hodi apoiu prevene no deteta Trans-Nasionál Krime ne'ebé ultrapasa iha fronteira terrestre.
"UNOCTTP prontu nafatin apoiu Servisu Migrasaun bainhira presiza hodi kombate krimi Trans-Nasionál iha fronteira," nia informa.
Entretantu Diretora Jerál Servisu Migrasaun Inspetora Xefe Adelaide de Rosa hatete, oportunidade di'ak tebes, tanba bele hetan apoiu ne’e husi parseiru UNOCTTP.
"Ita-nia esperansa boot ba iha apoiu ida-ne’e, atu bele fasilita ita deteta krimi Trans-Nasionál sira bainhira akontese iha pontu entrada sira," nia hatete.
Nia hatete, liuhusi apoiu sira-ne'e bele reforsa liutan servisu kontrolu hodi halo prevensaun ba kualker tipu krime iha fronteira.
"Ita agradese tebes parseiru United Nation Office on Countering Terrorist Travel Program (UNOCTTP) nia apoiu ba moderniza jestaun fronteira ne'e," Diretora SM Inspetora Xefe Rosa dehan.
Nia dehan, Servisu Migrasaun sei nafatin husu tulun ba parseriu sira hodi halo dezenvolvimentu ba sistema jestaun kontrolu iha fronteira.