Quarta, Fevereiro 19, 2025

Organizasaun Não Governamentál Fundasaun Mahein (FM) husu Polísia Nasionál Timor-Leste (PNTL) tenke reforsa servisu Intelijénsia hodi identifika autór ba kazu rama ambon sira nune'e bele submete ba prosesu.

Diretór Fundasaun Mahein Nelson Belo dehan, kazu rama ambon ne'e tenke iha kontrolu ne'ebé espesífiku hodi buka tuir autór loloos nune’e sira bele responsabiliza aktu krime ne'ebé komete.

Diretór Fundasaun Mahein Nelson Belo dehan, kazu rama ambon ne'e tenke iha kontrolu ne'ebé espesífiku hodi buka tuir autór loloos nune’e sira bele responsabiliza aktu krime ne'ebé komete.

"Ita husu Polísia Nasionál Timor-Leste (PNTL) atu reforsa servisu intelijénsia hodi bele identifika autór ba kazu rama ambon sira," nia dehan.

Nia dehan, rama ambon sai ona ameasa ida ba ema hotu, tanba ne'e Polísia tenké fó prioridade hodi kontrolu.

"Ita halo tratamentu ne’ebé mak espesífiku tenke fortifika servisu informasaun nian liu-liu intelijénsia atu bele haree asuntu refere atu bele tulun komandu PNTL nia desizaun iha ámbitu operasional nian," nia informa.

Nia dehan liga ba kazu rama ambon ne’ebé mak foin lalais akontese no vítima ida hetan hana, kazu sira-ne’e Fundasaun Mahin aviza beibeik ona kona-ba vizilansia polisiál nian tenke fortifika.

Iha parte seluk Xefe Suku Motael Luis António Gusmão Viegas dehan, kazu rama ambon durante ne'e lakon ona, tanba hetan kontrolu makas husi Polísia, maibé iha loron hirak liuba akontese fila fali.

"Ita husu ba Polísia tenke halo prosesu no apikasaun lei ho rigorózu ba autór sira ne'ebé kaer ona," nia hatete.

Nia dehan, ba oin Polísia tenke halo kontrolu maximu liu-liu iha tempu kalan hodi kontrola autór rama ambon sira nia movimentu nune'e labele halo ema seluk sai tan vítima.

Entretantu Komandante Polísia Munisípiu Díli Superintendente Xefe Orlando Gomes dehan, rama ambon ne'e konsidera hanesan krime arma-branka lei númeru 5/ 2017, tanba ne'e se de'it mak komete tenke prosesu tuir lei nune'e bele responde ba aktu krme ne'ebé nia komete.

"Ita Komandu Polísia Munisípiu Díli nafatin halo patrollamentu hodi halo prevensaun ba kualker krime iha kapitál Díli tantu rama ambon no krimé saida de'it, " Komandante Polísia Munisípiu Díli Superintendente Xefe Gomes hatete.

Nia dehan, Polísia sei la tolera hahalok kriminozu sira, se de'it mak halo krimé hodi estraga estabilidade sei kaptura no prosesu ba tribunál.

Enkuantu nia dehan, liga ba kazu rama ambon ne’ebé akontese iha Balibar ne'e Polísia kaptura ona autór na'in-rua submete kedan ba sela detensaun hodi kumpri 72 oras no kontinua prosesu ba Ministériu Públiku.