- Publika iha: 20 Janeiro 2025
Primeiru-Ministru Kayrala Xanana Gusmão husu Komandu Polísia Nasionál Timor-Leste (PNTL) atu reforsa servisu kontrolu iha fronteira hodi halo intervensaun ba Timoroan balun ne'ebé lori kilat musan tama no sai husi fronteira Batugade.
Nia dehan, ligadu ho hahalok sidadaun Timoroan balun ne'ebé lori kilat musan tama liuhusi Fronteira Batugade, lamenta tebes tanba ne’e Komandu PNTL tenke reforsa seguransa iha fronteira.
"Ha'u husu ba Komandu Polísia Nasionál Timor-Leste (PNTL) atu reforsa servisu kontrolu iha fronteira hodi halo intervensaun ba Timoroan sira ne’ebé mak lori kilat musan tama no sai husi fronteira Batugade, tanba ne’e seguransa estadu nian ne'e importante," PM Xanana dehan.
Nia hatete, husu Komandu PNTL atu tau atensaun sériu ba asuntu ne'e, hodi fortifika seguransa iha liña fronteira, liu-liu pontu-entrada sira atu nune'e ema labele naran lori kilat musan tama no sai iha pontu-entrada sira hodi fó ameasa ba seguransa estadu nian.
Iha fatin hanesan, Komandante Jerál Polísia Nasionál Timor-Leste (PNTL), Komisáriu Henrique da Costa, hatete, loos duni katak, iha sidadaun Timoroan ida lori kilat musan tama mai fronteira Batugade, hafoin partisipa serimónia funebre família nian iha NTT (Nusa Tenggrara Timur) Indonézia.
"Ita hetan informasaun husi servisu sira iha fronteira katak, joven Timoroan ida husi Indonézia tama mai fronteira Batugade, joven ne'e ba tuir funebre ninia família iha NTT Indonézia, bainhira nia fila mai ita identifika makina X-Ray kapta katak, iha nia pasta laran ne'e bala musan. Entaun depois de halo verifikasaun loos duni bala ualu (8) iha pasta laran, entaun ita nian parte servisu alfandega entrega kedan ba Polísia hodi halo prosesu investigasaun," nia informa.
Nia dehan, Investigasaun Kriminál Nasionál to'o kedan iha fatin hodi asegura kedan suspeitu.
"Suspeitu ne'e ita lori kedan ba iha Departamentu Investigasaun Kriminál nia fatin hodi halo prosesu, hafoin halo tiha prosesu ba suspeitu ita detein kedan suspeitu ne'e iha sela detensaun Komandu Jerál PNTL durante 72 oras molok submete ba primeira interogótoriu," nia saliente.
Enkuantu nia dehan, dehan, iha prosesu inisial ba suspeitu ne'e identifika du oan husi mémbru Polísia balun. No inisial husi suspeitu na’in rua ne’e mak GdSM no OLSG.
Nia dehan, kona-ba servisu kontrolu iha fronteira dadaun ne'e lao di'ak tebes, tanba servisu hamutuk entre Unidade Patroillamentu Fronteira (UPF), Forsa Terestre no Komandu Munisípiu sira ne'ebé besik iha fronteira, maibé komandu sei kontinua reforsa nafatin hodi kontrolu movimentu sidadaun sira ne'ebé tama no sai husi territóriu nasionál.