Quarta, Fevereiro 19, 2025

Durate tinan 2024 hahu husi Janeiru to'o Dezembru Departamentu Justisa no Disiplinar Iha Polísia Nasionál Timor-Leste (PNTL), rejista mémbru hamutuk na’in atus rua tolunulu resin rua (232) mak komete kazu disiplinár iha territóriu laran.

Durate tinan 2024 hahu husi Janeiru to'o Dezembru Departamentu Justisa no Disiplinar Iha Polísia Nasionál Timor-Leste (PNTL), rejista mémbru hamutuk na’in atus rua tolunulu resin rua (232) mak komete kazu disiplinár iha territóriu laran.

Diretór Departamentu Justisa no Disiplinar PNTL Superintendente Xefe Polísia Justinho Menezes hatete, membru na’in 232 ne’ebé komete kazu disiplinár ne'e ho tipu abandona servisu, envolve iha kontra bandu, no falta servisu, agresaun fízika, kontra ordem Komandu, servisu la profisionál no kazu seluk tan.

“Iha tinan 2024 ne'e ita rejistu mémbru Polísia Nasionál Timor-Leste PNTL na'in 232 mak komete iha kazu disiplinár hahu husi nasionál, munisípiu to'o esquadra sira iha territóriu laran," nia hatete.

Nia dehan, husi mémbru na'in 232 ne'e konklui ona prosesu hamutuk 166 no sei iha prosesu nia laran hamutuk 66 balun hotu ona maibé seidauk iha desizaun.

"Dadus membru hirak ne'e aprezenta husi kada Komandu ne'ebé membru refere servisu ba nune'e mós iha Komamdu Jerál PNTL ba Departamentu Justisa no disiplinár rejista hodi halo prosesu," Komandante Departamentu Justisa no disiplinár Superintendente Xefe Menezes dehan iha knaar fatin, Díli.

Nia informa, totál kazu ne'ebé prosesu disiplinár iha territóriu Timor laran tomak signifika iha 13 komandu munisípiu ho diresaun justisa no disiplinar kazu durante tinan ida iha 232.

“Iha tinan 2024 ne’e laiha demisaun, mais iha tinan 2023 no 2022 ne’ebé mak iha agora sei prosesu, tanba proposta ba demisaun ne’e iha haat, iha konsellu superior iha ona desizaun mais seidauk iha desizaun final husi Ministru Interior,” nia informa.

Aleinde ne'e kazu hanesan tiruteiu ne'ebé envolve mémbru Polísia Nasionál Timor-Leste no kontra bandu ne'e rejista duni númeru la to'o sanulu ba leten.

Entretantu Diretór Ezekutivu Fundasaun Mahein (FM) Nelson Belo dehen, membru polísia sira ne’ebé mak komete kazu ne'e komandu tenke aplika sansaun rigorozu atu nune'e sira bele evita se lae nafatin ho sira-nia hahalok ne’e.

"Fundasaun Mahein husu atu aplika lei liu-liu lei orgánika Polísia Nasionál Timor-Leste (PNTL) nian ho seriu hodi bele kontrola hahalok krime mémbru sira nian," nia saliente.

Nia dehan, fiar katak membru sira ne’ebé komandu rejistu ne'e balun komete kazu disiplinár ne'e dala rua ka tolu ona, maibé nafatin fó oportunidade ba sira hodi hala’o servisu hanesan mémbru polísia tuir loloos membru ne'ebé komete kazu disiplinár liuhusi ida tenke halo dimesaun.