- Publika iha: 26 Dezembro 2024
Atu identifika pisikolojia kada militár Komandu Falintil-Forsa Defeza Timor-Leste (F-FDTL) liu-liu iha Kuartel Jenerál realiza ezersisiu marsa forsada husi Nasuta tama to'o Díli.
Komandante Operasaun J3 F-FDTL Koronel João da Costa Esteves informa, atividade marsa forsada la'o ain ida ne'e la'ós foin dahuluk, maibé ida-ne'e hanesan ezersisiu ida hola parte iha treinamentu operasional nian.
"Aleinde treinamentu operasional, liuhusi ezersísiu marsa forsada ne'e atu bele fasilita ita identifika pisikolojia, espritu kamardajem, militár sira hodi kumpri ordem Komandu nian," nia hatete.
Nia dehan, marsa forsada ne'e partisipa husi mémbru kauze atus ida (100) ne'ebé destakadu iha Kuartel Jenerál Fatuhada Díli.
"Ezersísiu marsa forsada ida-ne'e hahú husi área Nasuta suku Tibar Postu Administrativu Bazartete Munisípiu Likisa tama kapitál Díli," Komandante Operasaun J3 F-FDTL Koronel Esteves informa.
Nia hatete, husi ezersísiu ne'e hanesan treinamentu operasional ida hodi prepara ba asegurasaun seguransa iha Natal no Tinan Foun mós.
Nia dehan, atividade ezersisiu marsa forsada la'o ida ne'e la'ós ba de'it militár sira iha Kuartél Jenerál Fatuhada mak hatudu la'o ain, maibé militár sira iha komponente no unidade sira mós iha programa kona-ba marsa forsada la'o ain rasik.
"Militár sira halo ezersisiu la'ós ida de'it, maibé iha ezersisiu lubuk iha mak hala'o kedas iha inisiu fulan Janeiru to'o Dezembru ohin, ami iha Kuartél Jenerál Fatuhada hatudu la'o ain husi nasuta tama to'o Dili atu hatene militár ida-idak nia pisikolojia espiritu kamaradajem militár sira tenki disiplina kumpri ordem Komandu," nia hatete.
Aleinde ne'e nia dehan, liuhusi ezersísiu sira-ne'e komandu F-FDTL bele avalia militár ida-idak nia disiplina moral, nune'e mós sukat saúde militár, depois halo protidaun operasional ba militár sira ne'ebé kaer pasta hanesan defeza nian oinsá mak ho nia kondisaun bele asegura servisu di'ak tuir misaun ne'ebé hakerek ona iha lei.
"Ezersisiu la'o ain sira hanesan ne'e ita bele avalia militár ida idak nia disiplina moral iha servisu fatin, bainhira kaer pasta hanesan defeza atu halo nia servisu ho di'ak no susesu asegura povu no nasaun Timor-Leste," nia salienta.
Entretantu Xefe Suku Tibar Domingos Lay dehan, militár sira tenke iha treinamentu barak nune'e bele asegura povu ho di'ak iha situasaun saida de'it.
"Atividade marsa la'o ain ne'e mós parte importante ida hodi hatene saúde mental membru sira nian ho di'ak nune'e bainhira hala'o servisu servi povu ho di'ak," nia dehan.
Nia dehan, povu presiza seguransa ne'ebé seguru atu nune'e bele halo movimentu ba ne'ebé de'it livre no seguru la iha intervensaun husi parte balun.