Quarta, Fevereiro 19, 2025

Polísia Nasionál Timor-Leste (PNTL) kordena ho autoridade lokál no igreja hodi regulariza sira iha dalan públiku no kada bairu nune'e labele viola ema seluk nia direitu.

Polísia Nasionál Timor-Leste (PNTL) kordena ho autoridade lokál no igreja hodi regulariza sira iha dalan públiku no kada bairu nune'e labele viola ema seluk nia direitu.

Xefe Departamentu Investigasaun Kriminál Nasionál (DIKN) Superintendente João Belo dos Reis dehan, prezepiu sira ne’ebé mak halo iha dalan públiku no kada bairu tenke halo tuir lei ne’ebé iha nune'e labele halo pertubrasaun ba ordem públiku.

"Ita regulariza prezepiu sira tantu iha estrada públiku no kada bairu sira nune'e labele viola ema seluk nia direitu. Tanba ema balun hakarak deskansa, balun ne’ebé moras no bebé oan sira," nia dehan.

Nia dehan, iha prezepiu sira-ne'e la utoriza hemu tua, toka múzika ne’ebé mak la iha relasaun no loron Natal nian.

"Bainhira ita deteta ida-ne'e ita sei prosesu tuir lei ne’ebé mak iha," nia dehan.

Aleinde ne’e nia husu ba inan-aman sira atu labele sosa fugetis ba oan sira hodi sunu fugetis no painson arbiru, bainhira deteka sei halo prosesu ba inan-aman.

Entretantu Xefe Suku Kaikoli Hipolito Sarmento dehan, regulariza prezepiu sira-ne'e importante tebes hodi halo prevensaun ba violénsia.

"Ita haree iha tinan kotuk kontese joven sira baku malu iha prezepiu, tanba kauza husi konsumu alkohol," nia hatete.

Nia dehan, tanba ne'e parte polísia no autoridade lokál sira koordena hamutuk ho parte igreja nune'e bele regulariza joven sira halo prezepiu katak labele besik liu iha estada, labele okupa trotoar, no labele hemu tua, halo barullu iha prezepiu.

Nia dehan, husu PNTL mós tenke kontrola seguransa másimu iha selebrasaun loron Natal no Tinan Foun.