- Publika iha: 20 Dezembro 2024
Ekipa Konjunta kompostu husi Polísia Nasionál Timor-Leste (PNTL) liuhusi Servísu Nasionál Inteligénsia (SNI), Unidade Polísia Marítima (UPM) no forsa Naval halo prende figetis 8 shoot hamutuk 288 iha área Palam Liquiçá.

Komadante Departamentu Investigasaun Kriminál Nasionál (DIKN), Superintendente João Belo dos Reis hatete, iha loron 01 fulan Dezemvru 2024 mais ou menus tuku 2 liu minutu 30 madrugada husi Servisu Nasionál Intelijénsia (SNI), Unidade Polísia Marítima (UPM) inklui Navál hamutuk halo operasaun hodi prende Figetes kaixa 4 ho montante 8 sut totál hamutuk 288 tanba ilegál.
"Liu husi operasaun koordenada ne'e ami ekipa konjunta prende sasan kontra bandu hanesan figetis ho tipu 8 shoot hamutuk kaixa haat (4) ense hamutuk iha 288 figetis," nia hatete.
Nia dehan, evidénsia sira-ne'e lori ona ba iha Departamentu Investigasaun Kriminál Nasionál hodi halo prosesu ba tribunál.
Nia dehan PNTL hanesan autoridade seguransa nafatin kontrola ba sasán ne’ebé kontra bandu atu tama mai iha territóriu nasionál, bainhira sé de'it mak hatama sasan kontra bandu mak PNTL kaptura nain sei ba hatan iha Tribunál.
"Sasan sira ne’ebé ami prende iha área Liquiçá Palam iha ne'ebá deteta katak envolvimentu mós Oknum PNTL balun ho nune'e prosesu investigasaun sei la’o hela bainhira investigasaun termina mak sira sala ou la sala.
Parte Investigasaun Kriminál sei aprezenta relatóriu ne’ebé ami halo kona-ba asaun ne’ebé ami halo ba sua exelensia Komandante Jerál PNTL atu hatene," Komandante Departamentu Investigasaun Kriminál Nasionál DIKN Superintendente Reis informa.
Nia informa, kazu ne'e rasik DIKN rejista ona ba Ministériu Públiku (MP), tanba sira mak nain ba kazu ne'e no bainhira iha informasaun balun DIKN sei update ba prosesu sira ne’ebé sira halo hela.
Entretantu Diretór Ezekutivu Fundasaun Mahein FM Nelson Belo dehen, durante ne'e sempre akontese Polísia prende sasán ilegál iha kapitál Díli.
"Krime kontra bandu ne'e sempre akontese no bainhira Polísia mós liu ona iha fronteira no tama Díli ona kauza husi ne'ebé, ita haree iha fulan Novembru de'it figetis komesa lian iha fatin-fatin, maibé kontrola Polísia menus iha sosiedade," nia hatete.
Nia dehan, tanba ne'e husu ba Polísia atu fortifika kontolu ba figetis iha kapitál Díli, tanba figetis ne'e mós impaktu ladi'ak ba ema nia vida.