- Publika iha: 04 Dezembro 2024
Polísia Nasionál Timor-Leste (PNTL) submete ona autór ba kazu tráfiku umanu na'in-rua (2) ba prosesu.
Xefe Departamentu Investigasaun Kriminál Nasionál (DIKN) Polísia Nasionál Timor-Leste, Superintendente Xefe João Belo dos Reis hateten autór na’in rua (2) ne'ebé submete ba prosesu liuhusi prosesu identifikasaun ne’ebé mak ekipa Investigasaun Kriminál Nasionál halo.
Nia dehan, iha identifikasaun ne’e hatudu katak autor na’in rua (2) ne'e nain ba fatin Karoke no Diskoteka ne’ebé lokáliza iha área Hudi-Laran, Suku Bairru-Pite Postu Administrativu Dom Aleixo Munisípiu Díli.
"Autór na’in-rua (2) ne’e tuir informasaun halo rekrutamentu ba feto na’in-hitu husi Indonézia atu servísu, maibé feto sira-ne’e sente sai vítima ba hahalok ne’e," nia dehan.
Nia dehan, sidadaun estranjeiru na'in hitu (7) ne'e sai vítima ba hahalok tráfiku umanu husi nain ba Karoke no Diskoteka.
"Ita submete ona autor na’in-rua (2) ba Ministériu Públiku hodi kontinua prosesu," nia dehan.
Nia dehan, vítima na'in-hitu (7) ne'e hetan ona asisténsia husi Unidade Polísia Vulnerável (VPU) no sei aprezenta autu notísia ba Ministériu Públiku.
"Bainhira parte Polísia prosesu remata ona ita sei aprezenta ba Servísu Migrasaun hodi halo deportasaun ba vítima na’in hirak ne’e," nia dehan.
Entretantu Xefe Departamentu Servísu Migrasaun Inspetora Adelaide de Rosa hatete, husi parte Migrasaun hein de'it bainhira mak parte Investigasaun Kriminál Nasionál aprezenta mai hodi halo prisesu deportasaun.
"Vítima hirak ne’e ita sei halo prosesu deporta fali ba sira-nia nasaun orijen," dehan hatete.
Nia dehan, dadaun ne'e husi parte servísu Migrasaun mós halo hela operasaun hodi kontrolu fatin Karoke no Diskoteka sira iha Díli laran.