- Publika iha: 04 Dezembro 2024
Komandu Polísia Nasionál Timor-Leste (PNTL) fortifika seguransa iha área fronteira terrestre entre Timor-Leste ho Indonézia ba prevensaun atividade komersiu ilegál.
Komandante Jerál Polísia Nasionál Timor-Leste (PNTL) Komisáriu Henrique da Costa dehan, dadaun ne'e ekipa konjunta kompostu husi Unidade Patrollamentu Fronteira (UPF), Unidade Espesiál Polísia (UEP), Komandu Polísia sira, no apoiu husi autoridade lokál sira halo servisu kontrolu atividade ilegál iha fronteira.
Nia dehan, operasaun konjunta ne'e atu kontrola atividade ilegál sira hotu iha fronteira liu-liu sigaru, gazolina, mina rai, fugetis no sasán seluk tan.
"Ita fortifika seguransa iha fronteira hodi halo prevensaun ba atividade komersiu ilegál sira tanba ita hotu hatene katak besik fin do ano ona atividade ilegál ne'e sempre akontese no rejistu aas iha fronteira," nia salienta.
Nia dehan, Polísia sei la tolera ema se de'it mak hatama sasan husi Indonézia mai Timor-Leste liuhusi dalan ilegál.
"Hotu-hotu tenke liuhusi dalan legál nune'e bele selu taxa ba kofre estadu," Komandante Jerál PNTL Komisáriu Costa dehan iha Sentro Formasaun Polísia (CFP) Comoro.
Nia dehan, se mak koko liuhusi dalan ilegál ekipa konjuta kaptura la iha toleransia no sei submete ba prosesu tuir lei ne’ebé mak vigor.
Entretantu Komandante Unidade Patrollamentu Fronteira (UPF) Superintendente Euclides Belo dehan, dadaun ne'e ekipa halo operasaun cek poin iha fronteira, tanba komunidade sira sempre halo atividade kontra-bandu, ba figetis, no sigaru, sira sempre halo meiu oin-oin atu atravesa.
"Ita haree balun koko atravesa husi tasi, balun husi rai maran, no fugetis sira ne’ebé mak sut 1 ka 2 ne'e sempre subar iha roda nia janti, to'o fatin destinasaun mak sira foin sobu," nia hatete.
Nia dehan, tuir informasaun ne'ebé sira hetan no konsege halo aprensaun ba kareta ida no kore roda nia janti hodi prende figetis no sigaru ne'ebé mak subar iha janti.
"Evidénsia hirak ne'e ami asegura hela iha kuartel Unidade Patrollamentu Fronteira (UPF) no fim do mes Novembru mak entrega mai investigasaun nasionál hodi kontinua prosesu ba Ministériu Públiku," Komamdate UPF Superintendente Bemo informa iha CFP.
Nia dehan, Unidade Patrollamentu Fronteira (UPF) kopera ho Komandu Polísia Munisípiu tolu hanesan, Bobonaro, Covalima, no Oecusse nafatin halo vizilánsia koordena mós ho Tentara Nasionál Indonézia (TNI) hod garante seguransa iha fronteira.