Komandu PNTL Halo Ona Manutensaun Ba Ró Patrollamentu UMP

Komandu Polísia Nasionál Timor-Leste (PNTL) halo ona manutensaun ba ro patrollamentu Unidade Polísia Marítima (UPM) hodi bele realiza fali atividade kontrolu tasi.

Komandante UPM Superintendente Polísia, Eugenio Pereira, hatete, ro patrollamentu ne’ebé dadaun ne'e halo ona manutensaun ne'e ho naran BP.601 Lusitania.

Nia dehan, ró Lusitania ne'e kuase tinan 11, Komandu PNTL la halo manutensaun hodi apoiu servìsu patrollamentu tasi nian, no iha tinan ne'e komandu foin halo manutensaun.

"Komandu Polísia Nasionál Timor-Leste (PNTL) halo ona manutensaun ba ró patrollamentu Unidade Polísia Marítima (UPM) nian ho orsamentu hamutuk $ 250.00," nia hatete.

Nia hatete, manutensaun ne'e halo iha parte mákina ró nian parte navegasaun no hadia eletrisidade sira iha ró Lusitania nia laran, buat tolu ne'e mak presiza halo manutensaun nune'e bele utiliza fali.

“Ita presiza halo manutensaun ro UPM nian ne'e tanba ró ne'e kuaze tinan 11 ona la halo manutensaun," Komandante UPM Superintendente Polísia Pereira dehan.

Nia dehan, manutensaun ne'e Komandu kontrata empreza Bibora Atauro Express mak halo manutensaun ba ró UPM, tanba empreza ne'e mak priense ona rekezitu aprovizionamentu Komandu Jeral PNTL nian.

Enkuantu nia dehan, dadaun ne'e UPM planea halo manutensaun ba ró Inviud inklui ró Kay Rala hodi bele halo operasionalizasaun. Maibé ba kestaun ne’e husi ekipa tékniku UPM halo hela levantamentu ba ró rua-ne’e.

“Kuandu ró sira-ne'e mak ita halo hotu manutensaun ami fiar total bele halo vizilansia ba iha ita-nia tasi ho di'ak liutan,” nia salienta.

Iha fatin reprezentante empreza Atauro Express, Luis Alves, garante empreza sei konklui manutensaun ró UPM tuir kontratu ne’ebé selebra ona ho Komandu PNTL.

“Ami kompañia hetan kontratu husi Komandu Jeral PNTL ba manutensaun ró Unidade Polísia Marítima, tuir kontratu ne’ebé mak iha manutensaun ne'e, durante fulan hitu, maibé garante katak ida-ne'e ami bele konklui antes de fulan hitu,” nia dehan.

Nia hateten, buat ida manutensaun ne'e la'ós buat fasil, maibé hanesan empreza ne’ebé Komandu PNTL fó fiar ba manutensaun ró UPM sei hare'e di-di'ak buat hotu loos ona mak foin hatama ró ne'e ba tasi laran nune’e bele halo operasaun.