Governu Koordena ho PNTL Halo Identifikasaun Ba Restu-Mortais

Governu liuhusi Ministério dos Assuntos Combatentes da Libertação Nacional (MACLN) koordena ho Polísia Nasionál Timor-Leste (PNTL) hodi halo prosesu identifikasaun ba restu-mortais liuhusi DNA hodi fasilita família sira hodi bele hatene.

Sekretáriu Estadu Assuntos Combatentes da Libertação Nacional Cesar do Santos da Silva "Merak" dehan, restos-mortais sira iha Hospitál Nacionál Guido Valadares (HNGV) no iha Osuario sira nesesidade duni hodi submete ba teste DNA hodi bele tulun família sira hodi hatene katak loos duni sira-nia inan-aman, nia restu-mortais mak ne'e.

Nia hatete, dalabarak ona sira halo prosesu identifikasaun ba restu-mortais hirak ne'e maibé la iha rezultadu, maibé iha tinan ne’e governu koordena ho PNTL konsege halo identifikasaun ba restu-mortais Saudoso Ola-Kasa liuhusi prosesu teste DNA.

"Governu liuhusi MACLN koordena ho Polísia Nasionál Timor-Leste liu-liu diresaun Forensik hodi halo prosesu teste DNA ba restu-mortais sira hodi fasilita família sira bele hatene," nia hateten.

Nia informa, restu-mortais mortais Saudoso Ola-Kasa nia restu-mortais submete ba prosesu teste DNA iha inisiu tinan ida-ne'e no liu teste ne'e konsege identifika ona katak ne'e restu-mortais husi Saudoso Ola-Kasa nian no entrega ona ba família no hein ba prosesu funebre iha Jardim dos Herois Metinaro.

"Ita nafatin apoiu Polísia Nasionál Timor-Leste liu-liu kona-ba ekipamentu sira ne’ebé presiza hodi bele fasilita di'ak liu tan prosesu teste DNA ba restu-mortais husi ita-nia saudoso sira ne’ebé to'o agora família seidauk hatene," Sekretáriu Estadu Merak dehan iha Komandu Jerál PNTL Caicoli, Díli.

Alenda ne'e nia husu ba família husi restu-mortais hirak ne'e atu bele hakbesik an ba Konellu Nasionál Libertasaun nune'e bele fasilita teste DNA.

Entretantu Komandante Jerál PNTL Komisáriu Henrique da Costa dehan, Polísia Nasionál Timor-Leste (PNTL) iha Departamentu Investigasaun Kriminál nia okos iha Sesaun Forensik ne’ebé iha nia knaar hodi halo ezaminsaun DNA nian.

"Ita iha kapasidade, tanba ita-nia membru sira iha formasaun avansadu hodi hala'o servisu espesifiku ida ne'e, ita mós iha ligasaun ho parseiru sira husi Austrália no Indonesia hodi apoiu ita hodi halo teste ba ita nia restu-mortais sira," nia hatete.

Nia dehan, Forensik Polísia Nasionál Timor-Leste (PNTL) halo ona prosesu ezaminsaun ba restu-mortais husi Saudoso Ola-Kasa nian no rezultadu hatudu loos duni katak Saudoso Ola-Kasa nian, tanba ne'e rezultadu teste DNA ne'e entrega ona ba família.

"Ba oin ita hetan nafatin konfiansa, ita nafatin apoiu halo ezaminsaun ba restu-mortais hirak ne’ebé mak iha," Komisáriu Costa saliente.

Nia dehen, Diresaun Forensik iha kapasidade, maibé iha difikuldade ituan kona-ba orsamentu.

Iha fatin seluk Lino Coreia oan husi Saudoso Ola-Kasa dehan, agradese ba governu, tanba bele apoiu ona halo teste ba restu-mortais husi Saudoso Ola-Kasa no agradese ba PNTL, tanba ho sira-nia profisionalizmu bele fó ona rezultadu pozitivu.

"Ami família agradase tebes ba esforsu husi parte hotu nian, hodi fó rezultadu ohin ami bele hatene duni ami-nia aman Saudoso Ola-Kasa nia restu-mortais loloos," nia hatete.

Alende ne'e nia husu governu atu fasilita mós teste ba restu-mortais sira ne’ebé sei iha, atu halo aprosimasaun ho família sira atu bele nune'e sira bele hatete.