PAM Ataúro husu Governu Aselera Pontu Entrada Ilha Ataúro no Liran

Prezidente Autoridade Munisípiu Ataúro Mateus Belo dehan, husu governu tenke aselera pontu entrada entre Ilha Ataúro ho liran Indonézia hodi fasilita movimentasaun komunidade nian.

Nia dehan, komunidade iha illa Ataúro Timor-Leste no illa Liran Indonézia maioria iha relasaun kulturál no família ne’ebé metin, durante ne'e sira hala'o hela, maibé dadaun ne'e iha orientasaun ne’ebé tenke taka.

Nia hateten, la’ós sira halo de’it atividade kulturál, maibé durante ne'e komunidade sira mós halo hela movimentasaun ba peska iha Illa Liran Indonézia hodi sustenta sira-nia moris loron-loron no desizaun taka pontu entrada ne'e susar tebes ba movimentasaun komunidade nian tantu iha Illa Ataúro no Liran.

"Husu ba governu tenke aslera lalais pontu entrada entre Ataúro Timor-Leste no Liran Indonézia hodi fasilita movimentasaun ita-nia komunidade sira," Prezidente Autoridade Munisípiu Ataúro Belo hateten.

Nia dehan, durante komunidade iha Illa rua-ne'e movimentasaun hodi halo sira-nia atividade kulturál nomós peska ne'e, atividade sira-ne’e la’o ona bainhira mosu atividade ilegal ka transaksaun illegal, tanba kontroladu husi ekipa seguransa hanesan Unidade Polísia Marítima (UPM).

"Ita-nia komunidade sira preokupa tebes, tanba taka tiha sira-nia movimentasaun entre Illa Ataúro no Liran," nia informa.

Tanba ne'e husu ba Ministériu relevante hodi solusiona lalais problema ne'e hodi responde ba movimentasaun komunidade nian.

Entretantu Ministru Interiór Francisco da Costa Guterres hateten, Timor-Leste nasaun soberania tanba ne'e prosesu hotu tenke tuir regra no enkuadramentu legál sira.

"Ita presiza iha komunidade no governu Indonézia oinsa bele funsiona pontu entrada entre Illa Ataúro no Illa Liran, tanba presiza buat barak ne'ebé mak tenke kompleta hodi funsiona," nia salienta.

Ministru ne’e husu komunidade sira aguenta lai, tanba governu Timor-Leste liuhusi Ministériu Interiór sei komunika ho governu Indonézia hodi responde ba preokupasaun entre komunidade sira iha Illa rua-ne'e, husu nafatin hein, tanba nasaun soberania presiza prosesu hotu.