Sexta, Março 01, 2024
Total visitors: 766366

Polísia Nasionál Timor-Leste (PNTL), kapasita joven feto no mane hamutuk na’in 269 iha Raiboro, postu administrativu Atabae, Munisípiu Bobonaro, tanba liu husi formasaun refere bele prepara sira oinsa servisu hanesan pontu-fokal ba prevensaun konflitu iha teritóriu laran.

Polísia Nasionál Timor-Leste (PNTL), kapasita joven feto no mane hamutuk na’in 269 iha Raiboro, postu administrativu Atabae, Munisípiu Bobonaro, tanba liu husi formasaun refere bele prepara sira oinsa servisu hanesan pontu-fokal ba prevensaun konflitu iha teritóriu laran.

Ministru Ministeriu Interior (MI) Fransisco da Costa Guterres dehan, formandu na’in 269 ne’ebé partisipa iha formasaun ne'e, depois de formasaun sei destaka sira ba kada postu iha teritoriu laran no sei servisu hamutuk ho autoridade lokál no Polísia Komunitária hodi halo prevensaun konflitu kria páz no estabilidade husi baze to'o nasionál.

Nia dehan, knaar ne’ebé pontu-fokál na’in 269 sei hala'o ne'e knaar importante, tanba sira nu’udar pontu-fokál no mediadór, tanba ne'e presiza hadia sira-nia koñesimentu nune'e hodi kontribui ba páz iha rai-laran.

"Ita husu tulun Polísia Nasionál Timor-Leste (PNTL) nian hodi apoiu kapasitasaun ba joven na’in 269 ne'e hodi prepara sira-nia koñesimentu ho di’ak, nune'e bele destaka kada munisípiu hodi hala'o knaar hanesan pontu-fokal no mediadór ba prevensaun konflitu," MI Guterres dehan.

Nia dehan, joven na’in 269 ne'e selesionadu kada Postu Admistrativu no Munisípiu iha teritóriu laran, kompostu husi feto 96 mane 173.

"Servisu iha área prevensaun konflitu ne’e la'ós buat fasil, tanba ne’e maka presiza iha formasaun atu oinsa bele aprosima ho komunidade no uza termus ne’ebé atu uza ba mediasaun iha nivel Munisipál, Postu to’o suku sira hotu iha teritóriu nasionál," nia saliente.

Nia dehan servisu ne'e sira sei halo mak primeiru deteta pontu situasaun, katak bainhira haree iha problema ruma ne’ebé afeita estadu ida-ne'e, bele uza sira-nia koñesimentu no buka atu prevene.

“Imi mós bele halo mediasaun, iha problema ajuda bolu ema halo diálogu, atu rezolve, imi labele sente aan katak imi ne’e la vale, imi tenke tau imi-nia an hanesan elementu importante atu ajuda estadu ida-ne’e harii páz no estabilidade atu bele dezenvolve rai ida-ne’e.

Knaar importante seluk ne’ebé atu halo maka atu identifika sinais konflitu sira ne’ebé akontese no fahe informasaun ba komunidade kona-ba servisu rezolusaun konflitu nian nune’e bele ajuda kria estabilidade. Tanba la’ós Polísia de’it maka atu fó seguransa, maibé estabilidade ne’e sai responsabilidade ema hotu nian, liu-liu hirak ne’ebé maka tutela iha Ministériu Interior," nia informa

Enkuantu formasaun ne'e realiza durante fulan ida hahu husi dia dia 16 novembru to'o dia 16 dezembru finaliza, hodi koloka sira ba kada postu orijen hodi hala'o knaar hanesan pontu-fokal no mediadór ba prevensaun konflitu.

Iha fatin hanesan formandu Rogerio da Cruz dehan, polítika governu nian hodi destaka pontu-fokál kada Postu no Munisípiu iha teritóriu laran ne'e di’ak tebes, tanba kria ona kampu traballu ba joven sira.

"Ami agradese tebes ba governu liuhusi Ministériu Interior fó fiar ona mai ami hodi hala'o knaar importante ne'e iha sosiadade," nia dehan.

Tanba ne'e nia dehan, bainhira fila ba servisu iha komunidade sei aplika siénsia ne’ebé mak sira hetan durante formasaun ne'e hodi aplika iha komunidade, nune'e bele kontribui ba prevensaun konflitu no kria páz estabilidade hahu husi baze.