- Publika iha: 19 Dezembro 2023
Xefe Governu Primeiru Ministro Kay Rala Xanana Gusmão, husu Polísia Nasional Timor-Leste (PNTL) reforsa seguransa iha munisípiu tolu hanesan Bobonaro, Baucau no Viqueque hodi halo prevensaun ba kazu krime sira.
Nia dehan, kazu asalta malu entre joven sira ne’ebé akontese iha munisípiu tolu refere sai preokupasaun, tanba ne'e komandu PNTL tenke hola responsabilidade másimu hodi kontrola situasaun refere, tanba husi kazu hirak ne'e komunidade mak sai vítima mate balun kanek nune'e mós uma komunidade nian ne’ebé hetan sunu.
"Ha’u husu PNTL tenke reforsa seguransa iha munisípiu tolu hanesan Baucau, Bobonaro no Viqueque hodi kontrola kriminozu sira no halo prevensaun ba konfrontasaun sira," Nia dehan.
Tanba ne'e nia dehan, labele husik aktu kriminál sira hodi estraga sosiadade no estabilidade iha Timor-Leste, tanba ne'e polísia tenke hola responsabilidade hodi kaer joven sira ne’ebé halo krime ne'e.
"Ha’u husu mós ba Polísia Komunitária sira atu hakbesik an ba joven sira fó hanoin ba joven sira atu nune'e labele kria tan problema," nia dehan.
Tanba ne'e nia dehan, konfrontasaun sira ne’ebé akontese iha munisípiu tolu ne'e sai preokupasaun ba ema hotu tanba movimentu la seguru.
Iha fatin hanesan Komandante Jerál PNTL Komisariu Polísia Henrique da Costa dehan kazu konfrontasaun ne’ebé akontese ne'e komunidade barak mak sai vítima, ferik katuas nune'e mós labarik, tenke toba iha rai malirin, tanba uma ema sunu.
"Ita reforsa ona seguransa iha área refere liuhusi Unidade Espesiál Polísia (UEP), Batallaun Orden Públika (BOP) nomós Unidade Patrolhamento Fronteira (UPF) hodi apoiu komandu PolísiaMunisípiu tolu ne'e hodi halo atuasaun ba kazu konfrontasaun hirak ne'e," nia hatete.
Nia dehan, husi kazu konfrontasaun ne'e uma 10 mak estragus tanba sunu, ema na’in7 kanek tolu mate, sira ne’ebé kanek dadaun ne'e halo hela tratamentu iha Hospital. Evidénsia ne’ebé polísia prende mak rama, ktana, dima nomós sasan kroat sira seluk ne’ebé joven sira uza hodi estraga komunidade.