Sexta, Março 01, 2024
Total visitors: 766366

Unidade Polísia Marítima (UPM) halo ona aprensaun ba atividade negósiu kontra-bandu tipu tolu (3) inklui sigarru, petasan, no kilat manu iha kapitál Díli ne’ebé mak tama ilegál husi fronteira.

Unidade Polísia Marítima (UPM) halo ona aprensaun ba atividade negósiu kontra-bandu tipu tolu (3) inklui sigarru, petasan, no kilat manu iha kapitál Díli ne’ebé mak tama ilegál husi fronteira.

Portavós Polísia Nasionál Timor-Leste (PNTL) António da Luz hateten aprensaun refere, UPM halo bainhira simu informasaun husi servisu informasaun no informa kedan ba komadu no UPM to’o kedan terenu hodi halo aprensaun ba evidénsia kontra-bandu hirak ne’e.

“Kontra-bandu ne’ebé mak ita halo aprensaun ne’e iha tipu tolu hanesan, sigarru ilegál, petasan, no kilat manu, nune’e mós ita halo aprensaun ba karreta baskolante ida ne’ebé mak autór sira utiliza hodi transporta sasan ilegál hirak ne’e liuhusi fronteira Batugade,” nia dehan.

Nia dehan, aleinde halo aprensaun ba evidénsia hirak ne’e UPM mós halo kapturasaun ba autór na’in rua ho inisiál AS no MM husi Munisípiu Bobonaro no dadaun ne’e submete ona ba prosesu investigasaun.

“Evidénsia ne’ebé ita prende, dadaun ne’e ita asegura hela iha komandu PNTL hodi submete ba prosesu,” Portavós Luz dehan.

Nia dehan, kona-ba suspeitu ne’ebé halo tranzasaun ilegál ba kontra-bandu ne’e kumpri sela detensaun 72 oras hodi halo prosesu investigasaun, nune’e hodi kontinua prosesu ba Ministériu Públiku.

Enkuantu nia dehan, atividade tranzasaun sigarru ilegál ne’e suspeitu hatama husi Munisípiu Bobonaro mai Díli la liuhusi Alfandega ho objetivu atu distribui ba kios kiik sira iha Díli laran.

Entretantu, antes ne’e Diretór Ezekutivu Fundasaun Mahein (FM), Nelson Belo dehan tranzasaun ilegál ne’ebé konsegue tama to’o Díli ne’e governu tenke halo investigasaun ba servisu autoridade seguransa sira ne’ebé destaka iha postu-fronteira.

“Ita haree atividade tranzasaun ilegal ne’e akontese bei-beik ona, tanba ne’e presiza investiga didi’ak membru sira ne’ebé koloka iha fronteira tanba saida,” nia dehan.

Maibé nia dehan, parte ida mós haree ba ekipamentu hodi deteta atividade tranzasaun ilegál sira governu tenke responde nune’e mós aumenta pesoál iha fronteira.