Sexta, Março 01, 2024
Total visitors: 766366

Falintil-Forsa Defeza Timor-Leste (F-FDTL) liuhusi komponente naval iha ona membru espesialidade iha fuzileiru hamutuk na’in 206 hodi asegura Tasi Timor ni’an.

Falintil-Forsa Defeza Timor-Leste (F-FDTL) liuhusi komponente naval iha ona membru espesialidade iha fuzileiru hamutuk na’in 206 hodi asegura Tasi Timor ni’an.

Komandante Komponente Naval, Comodoro Higino das Neves hatete tuir planu estratéjiku militár ne’e tenke iha kompañia rua ho membru na’in 500 maibé dadaun ne’e naval seidauk atinje nia númeru tarjetu.

Nia dehan, iha tinan 2022 ne’e fuzileiru iha de’it 63, no ofisialmente komandu F-FDTL tula tan boña ba membru fuzileiru foun hamutuk 143.

“Dadaun ne’e ita-nia Komponente Forsa Naval Lizeira iha ona membru fuzileiru nain 206 ne’ebé mak iha formasaun espesialidade hodi servisu iha tasi hodi kontrolu no intervensaun ba atividade ilegál sira iha tasi,” nia dehan.

Nia dehan, membru fuzileiru na’in 206 ne’e sei menus liu no seidauk priense nia padraun mínimu.

“Ita husu ba membru fuzileiru hirak ne’e atu servisu ho profesionalizmu no implementa saida mak imi hetan durante ne’e hodi serbí estadu ida-ne’e, liuhusi imi-nia misaun sagradu ne’e,” nia dehan.

Tanba ne’e nia dehan, orgullu tebes tanba Komponente Naval Lizeira bele iha ona espesialidade fuzileiru,maské seidauk tuir estadarte maibé komandu nafatin esforsu atu bele hatudu profisionalidade.

Entretantu Reprezentante Xefe Estadu Maior Jeneral F-FDTL, Maijór Jenerál Cornelio Ximenes “Maunana” dehan, dadaun ne’e F-FDTL komesa dezenvolve an ona no transforma sai militár ne’ebé mak profesionál.

“Ita-nia konseitu estratéjia militár ne’ebé aprova iha tinan 2020 katak, ita-nia membru fuzileiru ne’e tenke to’o kompañia rua ho membru 500, maibé ita seidauk priense ,tanba ligadu ho membru F-FDTL ne’ebé mak sei minimu hela,” nia dehan.

Maibé ho membru fuzileiru ne’ebé natoon komandu nafatin agradese, tanba F-FDTL bele iha ona membru espesialidade iha fuzileiru.

“Mariña ne’e ami luta bo’ot, uluk ita independénsia ita hakarak sai forsa iha polítika estratéjia dehan katak ita só bele iha batallaun 2 de’it, maibé ida-ne’e la’ós ita-nia hakarak maibé ida-ne’e ezijénsia nasaun nian,” Maijór Jenerál Cornelio Ximenes “Maunana” dehan.

Enkuantu nia dehan, komponente naval iha asisténsia makas husi governu Português, tanba fó ona ró rua, nune’e mós dadaun ne’e konstrui tan muzeum.