- Publika iha: 06 Junho 2013
Kazu asidente motor ho motor ne’ebe maka soke malu iha area Kulu-Hun nian rezulta ema nain hat mate iha fatin enkuantu nain rua seluk kanek deit.
Komandante Polisia Nasional Tranzitu (POLTRANS, Inspektor Xefe Antonio L.C. Soares konta katak, akontesementu ne’e rasik akontese iha ponte Kulu-Hun nian, dia 16 Abril 2013, iha tuku 02:30 madrugada no motor rua ne’e mai husi dirasaun ne’ebe kontrariu no sira soke malu iha los ponte ne’e.
“Ema nain hat mate no nain rua kanek,” informa Komandante POLTRANS, Inspektor Xefe Soares, foin lalais, iha Kaikoli,Dili.
Nia hatutan, motor rua ne’e kada motor ida tula ema nain tolu no la uja kapaseti, laiha karta kondusaun inklui mos laiha sapa matrikula polisia nian (plat nomor polisi).
“Tuir informasaun husi komunidade katak sira iis tua, maibe ami labele kondena ida ne’e tanba laiha alat ida atu halo teste ba ida ne’e,” dehan Komandante Soares.
Nia mos informa katak, atu prosesa kazu ne’e maibe difisil oituan tanba motorist nain rua ne’e mate hotu, enkuantu kona ba motor rua ne’ebe agora sei para hela iha Polisia Tranzitu Distritu Dili, familia sir abele ba foti maibe tenke halo auto de entrega husi tribunal distrital.
“Tanba kazu ne’e rasik regista ona iha Tribunal Distrital Dili,” tenik Komandante Soares.
Iha lidun seluk Prezidente Komisaun B (Seguransa, Defeza no Negosiu Estrangeiru), Deputada Maria Lurdes Bessa hateten, ida ne’e kazu asidente ne’ebe mak grave.
“Ita nia nasaun ne’e iha regras, ema ida atu lori motor mos iha nia regras, ne’ebe hau hanoin ita nia polisia tranzitu presiza halo patruliamentu ne’ebe maka permanente liu,” sujere Prezidente Komisaun B ne’e.
Deputada ne’e mos apela hela ba inan aman sira atu bele atu bele fo atensaun ba sira nia oan sira,liu-liu jovens sira, atu nune’e bele proteje sira nia an rasik.
“La’os hanoin at maibe tanba jovens, sira hakarak koko buat hotu-hotu, maibe fo perigu mos ba sira nia vida rasik,” apela Deputada Bessa.