Terça, Maio 21, 2024
Total visitors: 766366

Polísia prosesu ona joven na’in 5 ne’ebé mak identifikadu envolve direita iha kazu konfrontasaun ne’ebé akontese iha suku Macadique, Postu Administrativu Uatulari, Munisípiu Viqueque.

Polísia prosesu ona joven na’in 5 ne’ebé mak identifikadu envolve direita iha kazu konfrontasaun ne’ebé akontese iha suku Macadique, Postu Administrativu Uatulari, Munisípiu Viqueque.

Komandante Jeral PNTL, Komisáriu Henrique da Costa dehan, kazu konfrontasaun refere rezulta komunidade nia uma hitu (7) hetan estragus no karreta Patrollamentu Polísia nia rahun no komunidade balun kanek.

"Despois de akontesimentu ne'e ita-nia membru sira to'o kedan fatin hodi halo intervensaun, kaptura suspeitu sira ne’ebé komete iha konfrontasaun ne'e," nia dehan.

Nia dehan, polísia kaptura joven na’in lima no dadaun ne'e kumpri ona sela detensaun no prosesu investigasaun.

"Liuhusi rezultadu investigasaun ne'e mak ita kontinua prosesu joven na’in lima ne’ebé ba Ministériu P’ubliku hodi kontinua ba tribunal hodi responsabilidade ba aktu krime ne’ebé sira komete," Komandante Jeral PNTL Komisáriu Costa dehan.

Enkuantu nia dehan, kazu ne'e akontese entre grupu Arte Marsial (GAR), nune’e provoka malu to’o mosu konfrontu entre suku rua.

“Kazu ne’e ita nian Eskudra Uatulari hetan apoiu husi forsa reserva (Taksforce) no Batallaun Orden Públika Baucau, halo kedan intervensaun iha momentu ne’e kedan no konsege netraliza tiha situasaun iha fatin refere," nia informa.

Entretantu Diretor Ezekutivu Fundasaun Mahein (FM), Nelson Belo dehan, kazu konfrontasaun ikus ne'e komesa akontese fali ona liu-liu iha parte Baucau, Viqueque, Covalima no Díli halo komunidade sente la seguru.

"Kazu sira-ne'e akontese, tanba aktu husi grupu arte marsiais no rituais sira, no Komisaun Reguladora Arte Marsiais (CRAM) tenke iha responsabilidade hodi halo prevensaun ba krime liuhusi sira-nia servisu karik bele haree tok fukun ne'e iha ne’ebé," nia dehan.

Nia dehan, CRAM iha ona lei hodi regula, halo ona investimentu ba grupu Arte Marsial no Rituais sira, fó ona lisensa hodi halo sira-nia atividade, maibé kontinua akontese konfrontasaun, tanba ne'e husu atu halo servisu ho sériu hodi bele identifika no rezolve lakunas hirak ne'e.