Governu Implementa Jestaun Fronteira Koordenada

Governu liuhusi Ministériu Finansas asina MoU ho Alfandega, Polísia Nasionál Timor-Leste (PNTL) no Servisu Migrasaun (SM) kona-ba implementasaun jestaun fronteira koordenada ba kontrolu fronteira hodi fasilita viajen, komérsiu, no implementa mekanizmu governasaun iha fronteira sira.

Vise-Ministra Finansas, Santina Viegas, dehan implementasaun ne'e bele promove koordenasaun servisu serguransa iha fronteira kona-ba kontrolu no inspesaun, seguransa no fasilitasaun lezitimu ba viajen no sasan ne’ebé tama no sai husi fronteira nune'e bele prevene atividade ilegal.

"Jestaun Fronteira Koordenadu hodi kontrolu husi ajénsia fronteira ba viajen doméstika no internasionál iha kontekstu atu buka efisiénsia ne’ebé boot hodi jere komérsiu no kuartu viajen nian.

Ida-ne'e bele ajuda ita fahe servisu hodi kontrolu no halo antisipasaun ba risku sira ne’ebé durante ne'e akontese iha liña fronteira," Vise-Ministra Finansas Viegas dehan.

Tanba ne'e nia dehan, jestaun fronteira ne’ebé lansa ona ne'e, bele kria mekanizmu governasaun operasional hodi implementa Jestaun Fronteira ne’ebé Koordenada.

Entretantu, Komandante Jerál PNTL, Komisáriu Henrique da Costa dehan, Jestaun Fronteira Kordenada ne'e sei funsiona hanesan ajénsia ida hodi koordena atividade iha fronteira liuliu diskuti, resolve, relata,kestaun no asegura alokasaun rekursu.

"Dadaun ne'e ita-nia membru ne’ebé aloka iha fronteira kompostu husi postu Mota-Ain Batugade Oecusse no Covalima hamutuk fronteira 78. Ne'e fronteira luan tebes no rekursu sei menus, tanba ne’eespera katak husi jestaun fronteira koordenada ne'e ministériu relevante ne’ebé destaka iha fronteira bele servisu apoiu malu," nia dehan.

Enkuantu nia dehan, total membru ne’ebé destaka iha Fronteira liuhusi Unidade Patrollamentu Fronteira (UPF) ho membru hamutuk na’in 347.

Iha fatin hanesan Komisáriu Alfandega Jose Abilio dehan, implementasaun Jestaun Fronteira Koordenada ne'e hanesan meiu ida hodi fortifika seguransa ba prevensaun risku sira ne’ebé sempre akontese.

"Ita presiza fortifika ita-nia ekipa husi instituisaun relevante sira atu bele halo koordenasaun hamutuk nune'e ita bele halo kontrolu ida efetivu," nia dehan.

Nia dehan, nune'e bele halo prevensaun ba atividade ilegais, kontra bandu no ilisitus sira iha fronteira. Nune'e mós governu tenke halo tan investimentu.