Quinta, Julho 18, 2024

Raes Hadomi Timor Oan (RHTO) husu Polísia Nasionál Timor-Leste PNTL tenke sensivel ba asuntu defisiente iha programa polísia nian liu-liu iha Unidade Polísia Vuneravel (UPV).

Raes Hadomi Timor Oan (RHTO) husu Polísia Nasionál Timor-Leste PNTL tenke sensivel ba asuntu defisiente iha programa polísia nian liu-liu iha Unidade Polísia Vuneravel (UPV).

Diretór Ezekutivu RHTO João Zito dos Santos dehan, VPU iha kompeténsia tomak hodi halo atendimentu ba feto no labarik grupu vuneravel sira liu-liu ba ema ho defisiente atu bele asesu ba seguransa iha ne’ebé mak dignu.

"Ita husu Polísia Nasionál Timor-Leste tenke iha sensivel ba asuntu defisiente sira iha programa sira liu-liu iha VPU, atu nune'e bele iha atendimentu seguransa ne’ebé di’ak no iha valór ba ema ho defisiente hodi refleta ba ita-nia prinsípiu konstituisaun katak direitu demokrátiku ita asegura diretu ba ema hotu hanesan," Diretór Zito dehan iha CFP Comoro, Díli.

Nia dehan, RHTO iha ona kooperasaun di’ak ho PNTL hodi inklina asuntu defisiente iha sira-nia programa,tanba asuntu defisiente ne'e asuntu direitu humanus no instituisaun estadu nian hotu tenke tau matan tuir idiaidak nia parte.

Tanba ne'e espera katak ho prezensa PNTL nian ne'e, grupu vuneravel sira-ne'e bele hola parte iha atendimentu ida ne’ebé mais di’ak liu dignu atu nune'e bele reflete ba objetivu dezenvolvimentu sustentavel.

"Tuir dados sensus uma-kain 2022 ema ho defisiente hamutuk 93,000 ital husi tipu defisiente matan, fízika, tilun no bisu," nia informa.

Tanba ne'e espera katak ho servisu kooperasaun entre RHTO ho PNTL ne'e iha futuru bele la’o di’ak nune'e bele hetan atendimentu seguransa di’ak liutan ba ema ho kondisaun defisiente iha Timor-Leste.

Iha fatin hanesan, Komandante Jerál PNTL nian, Komisáriu Henrique da Costa dehan, atu halo atendimentu seguransa di’ak ba ema ho defisiente dadaun ne'e membru sira iha ona treinamentu espesífiku hodi halo atendimentu ba ema ho defisiente.

Nia dehan, dadaun ne'e membru sira husi nasionál no Komandu Polísia Munisípiu Díli nian iha ona treinamentu espesífiku oinsa halo tendimentu ba ema ho defisiente nomós iha futuru sei halo mós ba membru sira iha munisípiu.

"Ita-nia membru sira tenke hatene oinsa halo tendimentu ba ema ho defisiente, tanba iha terenu sira sempre hasoru, maibé atendimentu seguransa ba ema ho defisiente sira seidauk di’ak, tanba ne'e treinamentu espesifiku sira importante tebes ba ita-nia membru sira," Komandante Jerál PNTL Komisáriu Costa dehan iha CFP Comoro, Díli.

Nia dehan, treinamentu espesífiku kona-ba atendimentu seguransa ba ema ho defisiente ne'e hetan apoiu husi Timor-Leste Police Development program (TLPDP) no organizasaun Reas Hadomi Timor Oan (RHTO).