Quinta, Junho 13, 2024
Total visitors: 766366

Fundasaun Mahein (FM) husu komandu Falintil Forsa Defesa Timor-Leste F-FDTL no Polísia Nasional Timor-Leste PNTL tenta investiga membru sira ne’ebé utiliza arma hodi oho karau komunidade nian.

Diretór Ezekutivu FM, Nelson Belo, dehan instituisaun ne’ebé lei autoriza utiliza arma mak polísia ho militár, tanba ne'e kazu sira ligadu ho tiru komunidade nia karau iha Manufahi ne'e tenke halo investigasaun.

Diretór Ezekutivu FM, Nelson Belo, dehan instituisaun ne’ebé lei autoriza utiliza arma mak polísia ho militár, tanba ne'e kazu sira ligadu ho tiru komunidade nia karau iha Manufahi ne'e tenke halo investigasaun.

"Ita husu komandu rua F-FDTL no PNTL tenke halo investigasaun ba membru sira ne’ebé uza kilat hodi oho karau komunidade nian," nia dehan.

Nia dehan, asaun ne'e la di’ak tanba utiliza arma ho brutalismu hodi oho komunidade nia animál ida-ne'e tenke submete ba prosesu.

"Militár ne'e iha regra ne’ebé rigorozu tebes, bainhira utiliza arma ba patrollamentu fila mai tenke halo relatóriu, kona-ba utiliza kilat ne'e, se la uza tenke halo relatóriu, kuandu uza mós hakerek relatóriu bala ne'e uza hodi tiru saida," Belo dehan.

Tanba ne'e, nia nafatin sujere ba komandu atu bele halo investigasaun hodi identifika loloos kazu refere hodi bele fó sansaun ba membru hirak ne’ebé uza kilat oho karau komunidade nian, tanba ne'e akontese bei-beik ona.

Entretantu, Portavós PNTL Superientendente Antonio da Luz dehan, komandu simu ona informasaun husi munisípiu katak uza kilat hodi tiru karau komunidade nain, iha loron hirak liuba iha munisípiu Manufahi ne'e identifikadu husi membru F-FDTL husi Unidade Polísia Militar nian ida.

"Informasaun ne’ebé ami simu ne'e mos dehan iha ona komunikasaun entre parte rua ne'e no deside rezolve tuir dala familia nian," nia dehan.

Alende ne'e nafatin apela ba membru sira bainhira utiliza kilat tenke tuir lei no orden, la’ós utiliza fali hodi oho komunidade nia animál.