Ema Na’in 48 Lakon Vida Durante Fulan 8 Iha Territóriu Laran

Ema na’in 48 lakon vida durante fulan fulan 8 nia laran, hahú husi Janeiru to’o Agustu 2023, tanba impaktu husi asidente tráfiku ne’ebé akontese iha territóriu laran tomak.

Komandante Tránzitu Seguransa Rodaviaria Nasionál, Superientendente Asistente Luis da Costa, dehan totál asidente ne’ebé akontese iha territóriu laran tomak hamutuk 1094 ne’e kompostu husi mate, kanek todan, no kanek kmaan.

“Durante fulan 8 ne’e ita rejistu kazu asidente tráfiku ne’ebé akontese ne’e hamutuk 1094 husi ne’e iha ema na’in 48 mak lakon vida, kanek todan iha 223, no seluk kanek kmaan,” nia hatete.

Nia dehan, asidente sira ne’ebé akontese impaktu husi fatór humanu rasik, tanba kondús karreta no motorizada la kontrola kondisaun transporte, lanu, nune’e mós tanba kondisaun estrada.

“Husi kazu sira-ne’e ita prosesu ba tribunál iha 48 kazu no sei prosesu nia laran iha 485 no rezolve família 472,” Komandante Costa dehan iha knaar fatin Kaikoli, Díli.

Nia hatete, atu halo prevensaun ba asidente tráfiku sira, komandu iha ona polítika rasik liuhusi sosializasaun ba motorista no kondutór sira.

“Ita presiza halo sosializasaun, tanba asidente sira ne’ebé akontese ne’e maioria kauza husi fatór ema rasik,” nia informa.

Tanba ne’e nia dehan, asidente sira ne’ebé kontinua akontese ne’e, tanba maioria motorista no kondutor sira seidauk komprende lei kódigu estrada.

Entretantu, motorista Joaquin Gomes, dehan loos katak durante ne’e asidente tráfiku sempre akontese iha fatin-fatin tuir publikasaun sira iha média sosiál.

“Ita haree asidente hirak ne’e labarik minoridade ne’ebé laiha karta kondusaun mak kondús motorizada, ne’e mak barak liu fali ema sira ne’ebé iha ona karta kondusaun,” nia dehan.

Tanba ne’e, nia husu ba parte polísia liu-liu seksaun tránzitu atu kontrolu labarik minoridade sira ne’ebé kondús karreta ka motorizada iha dalan públiku, tanba lori impaktu ba sira-nia vida nune’e mós ema seluk nian.