Segunda, Outubro 02, 2023
Total visitors: 766366

Fundasaun Mahein (FM) husu Polísia Nasional Timor-Leste (PNTL) fortifika servisu informasaun iha fronteira hodi kombate atividade merkadu ilegál.

Fundasaun Mahein (FM) husu Polísia Nasional Timor-Leste (PNTL) fortifika servisu informasaun iha fronteira hodi kombate atividade merkadu ilegál.

Diretór Ezekutivu FM, Nelson Belo, dehan atividade merkadu ilegál ne’ebé kontinua rejistu as iha fronteira ne'e, tanba menus servisu informasaun.

"Ita haree merkadu ilegál ne’ebé akontese iha fronteira ne'e rejistu as ne'e tipu rua de’it, tabaku, no mina-rai, ita haree atividade kontra-bandu hirak ne'e akontese, tanba servisu informasaun sei menus iha fronteira," nia dehan.

Nia dehan, merkadu ilegal sira ne'e akontese sempre ultrapasa tiha fronteira mak detekta ida ne'e mos presiza haree no hadia fallansu sira-ne'e.

Tanba ne'e nia dehan, atividade merkadu ilegál ne'e lalori benefísiu mai nasaun Timor-Leste, maibé ba Indonézia.

Entretantu, Portavós PNTL, Superientendente Antonio da Luz, dehan sidadaun hotu tenke kumpri lei no regulamentu vigora iha Timor-Leste.

"Ita hatene katak sidadaun sira buka moris maibé tenke kumpri lei, hodi bele hadia imi-nia moris, tanba buat ida ilegál ne'e prejudika imi kuandu ami hetan tenke prosesu tuir lei ne’ebé mak iha," nia dehan.

Tanba ne'e nia dehan, servisu sekreta PNTL nian sei esforsu nafatin ho rekursu ne’ebé natoon hodi halo prevensaun ba atividade ilegál iha fronteira, tanba ne'e husu sidadaun sira tenke kumpri lei.

Nia dehan, husu mós ba komunidade atu bele servisu hamutuk ho parte polísia nune'e bele deteta atividade ilísitu iha fronteira, tanba polísia servisu mesak labele kombate buat ida, presiza kontribuisaun ema hotu nian.