Domingo, Junho 16, 2024
Total visitors: 766366

Prezidente Repúblika Demokrátika Timor-Leste Jose Ramos Horta husu Falintil-Forsa Defesa Timor-Leste (F-FDTL) tempu to'o ona hodi prepara-an ba kombate krime transnasionál liu-liu ekonomia relasaun ho peska ilegál.

Prezidente Repúblika Demokrátika Timor-Leste Jose Ramos Horta husu Falintil-Forsa Defesa Timor-Leste (F-FDTL) tempu to'o ona hodi prepara-an ba kombate krime transnasionál liu-liu ekonomia relasaun ho peska ilegál.

Prezidente Horta dehan, krime transnasionál liu-liu peska ilegál ne'e barak mak akontese iha tasi Timor-Leste nian, rezulta riku-soin barak mak lakon ona.

"F-FDTL tenke prepara an hodi kombate krime transnasionál liu-liu ligadu ho ekonómika peska ilegál iha ita-nia tasi," Prezidente Horta dehan iha Odelgomo, Bobonaro, foin lais.

Nia dehan, F-FDTL tenke kontrola tasi área jurídiku Timor-Leste nian, hodi halo intervensaun ba atividade peska ilegál iha água territoriais no zona ekonómika ezkluziva.

"Militár iha knaar importante tebes hodi kombate krime transnasionál sira, nune'e mós fó seguransa ba ita-nia rekursu naturais hotu iha tasi," Prezidente Horta dehan.

Tanba ne'e presiza koloka infraestrutura ba militár sira, nune'e mós ekipamentu ho manutensaun, buka hametin rekursu operasionál atu sira bele halo servisu hodi halo prevensaun ba krime transnasionál sira no di’ak.

Nia dehan aleinde F-FDTL mós bele prepara an hodi halo intervensaun karik akontese dezastre ruma ne’ebé akontese iha área tasi nian.

Entretantu, Vise Xefe Estadu Maior Jenerál F-FDTL, Calisto Ximenes "Koilati" dehan militár sira prontu iha kulker situasaun hodi kombate krime transnasionál sira iha tasi Timor-Leste nian ho ekipamentu no rekursu ne’ebé durante ne'e iha.

"Militár kaer metin nia moto katak militár hanesan bee no povu hanesan ikan, tanba ne'e prontu fó seguransa ba nian povu no riku-soin iha tasi, nune'e mós rai-maran," nia dehan iha Odelgomo Bobonaro.

Tanba ne'e nia dehan, F-FDTL nia ezisténsia ba dala 48 ona, nafatin firme no kumpri nia misaun hodi kumpri orden liuliu fó seguransa ba rai doden Timor-Leste.