Quinta, Junho 13, 2024
Total visitors: 766366

Primeiru-Ministru Kay Rala Xanana Gusmão husu Falintil Forsa Defesa Timor-Leste (F-FDTL) fortifika kontrola hodi defende riku-soin Timor-Leste nain iha tasi no sita katak iha tasi mane ne'ebá peska ilegál sira naok hotu riku-soin Timor-Leste nian, tanba ne'e forsa sira tenke atensaun.

Primeiru-Ministru Kay Rala Xanana Gusmão husu Falintil Forsa Defesa Timor-Leste (F-FDTL) fortifika kontrola hodi defende riku-soin Timor-Leste nain iha tasi.

"Ita husu F-FDTL tenke esforsu makas hodi defende riku-soin rai ne'e nian iha tasi, tanba ne’e forsa sira labele iha hanoin hodi ba halo funu maibé tenke prepara an hodi kontrolu tasi mane," nia husu iha Sentru Formasaun Polísia (CFP), iha Comoro, Díli.

Tanba ne'e nia dehan, dezenvolvimentu nasaun nian forsa sira ida-idak ho nia misaun hodi proteje liuliu riku-soin tasi nian.

"Forsa tenke prepara an hodi ba kontrola tasi mane, tanba nasaun balun mak haruka sira-nian ró mesak bo'ot hodi kaer ita-nian ikan. Sira hili de’it mak ikan sira bo'ot no ki'ik husik mate de’it, mai to'o ita-nia tasi ibun," PM Xanana dehan.

Iha fatin hanesan, Xefe Estadu Maior F-FDTL, Tenente Jeneral Domingos Raul Falur Rate-Laek dehan, militár prontu kumpri orden.

"Ami rekursu umanus iha ona hein de’it estadu ka governu investe iha meiu ka ekipamentu, ne'e ita prontu kumpri ita-nia misaun," nia hatene.

Tanba ne'e nia dehan, dadaun ne'e F-FDTL liu-liu Komponente Naval Lijeira iha ona ró 2 ne’ebé mak halo manutensaun hotu ona no bele utiliza ba kontrolu tasi-mane.