- Publika iha: 29 Maio 2023
Unidade Polísia Marítima (UPM) durante ne’e menus pesoál hodi destaka iha postu vizilánsia área kosteira hodi halo prevensaun ba krime sira ne’ebé mak akontese iha área marítima.
Komandante UPM Superientendente Eugenio Pereira dehan, postu vizilánsia área kosteria dadaun ne’e la iha pesoál hodi hala’o misaun ba prevensaun aktu krime organizadu sira.
“Ita iha postu vizilánsia hamutuk 20 iha territóriu laran nune’e mós ita destaka membru balun iha ró laran hodi halo operasaun,” nia dehan.
Nia dehan, husi postu vizilánsia 20 ne’e kada postu destaka membru hamutuk na’in 6 hodi halo servisu kontrolu maibé ne’e sei menus liu no postu balun la iha pesoál hodi koloka ba.
“Ita menus pesoál hodi destaka iha postu vizilánsia área kosteria, hodi halo seguransa nune’e mós halo prevensaun ka intervensaun bainhira kazu krime ruma akontese iha tasi,” Komandante Pereira dehan.
Tanba ne’e nia husu atu bele aumenta tan pesoál UPM nian atu nune’e bele koloka hodi fó seguransa liu-liu iha postu vizilánsia área kosteria nian.
“Dadaun ne’e ita iha membru hamutuk na’in 160, ida-ne’e la sufisiente atu koloka ba iha postu vizilánsia nune’e mós apoiu servisu administrasaun iha Kuartel UMP nian,” nia hatete.
Entretantu, Vise-Ministru Ministerio Interior, Antonio Armindo, dehan aumenta pesoál ba iha unidade sira ne’e presiza halo rekrutamentu ba membru foun nune’e bele komplenta ba iha postu sira ne’ebé mak sei falta pesoál.
“Rekrutamentu membru foun ne’e planu ita halo hotu ona. Tuir planu ne’ebé iha ita sei rekruta membru hamutuk na’in 300 resin hodi kompleta ba sira ne’ebé mate ona nune’e mós reforma,” nia salienta.
Tanba ne’e nia husu ba unidade sira aguenta lai servisu ho rekursu ne’ebé mak dadaun ne’e sira iha no governu no Komandu Jeral PNTL sei rezolve problema menus rekursus iha tempu besik.