- Publika iha: 11 Maio 2023
United Nations Development Programme (UNDP) konstrui ona uma seguru tolu ba Unidade Polísia Vuneravel (VPU) iha munisípiu Ermera, Viqueque, no Bobonaro hodi halo atendimentu ba vítima vunerabilidade sira ba kazu violénsia doméstika nune’e mós kazu violénsia sexual, ho seguru.
Resident Representative UNDP Timor-Leste, Tuya Altengerel, dehan UNDP liuhusi programa Spotlight parseria ho Polísia Nasionál Timor-Leste (PNTL) espesialmente iha área kombate violénsia sexuál no doméstika hodi responde ba investigasaun ne’ebé profesionál no abordajen sensitivu ba vítima sira.
“UNDP konstrui uma seguru tolu ba VPU iha munisípiu Ermera, Viqueque, no Bobonaro hodi projete vítima sira husi sofrimentu, liuhusi uma seguru ne’e hodi fornese espasu seguru ba vítima sira hodi buka seguransa no asesu ba justisa,” nia dehan.
Nia dehan, konstrusaun uma seguru ne’e nesesáriu tebes nune’e mós ho padraun internasionál hodi garante privasidade, konfidensialidade ba vítima sira bele sente seguru bainhira hato’o sira-nia informasaun ba ofisiál VPU nune’e mós bele deskansa.
“Ita mós sei fornese protokolu ba fatin seguransa asesibilidade nune’e mós hasa’e kapasidade VPU nian, ami garante katak fatin seguru ne’e sei lori efikasi no efisiénsia ba hodi responde ba violénsia doméstika nune’e més violénsia sexual,” Resident Representative Altengerel dehan.
Alende ne’e nia dehan, polísia sai figura importante hodi fo asisténsia ba sobre vivente violénsia doméstika nune’e més violénsia sexual no violénsia bazeia ba jéneru.
Entretantu, Komandante Unidade Polísia Vuneravel (VPU), Inspetór Ricardo da Costa, dehan uma seguru ne’e foin halo iha Viqueque, Bobonaro no Ermera, no munisípiu seluk seidauk.
“Uma seguru ne’e nia dezenu no modelu hanesan de’it hodi responde ba ezijénsia komunidade nian bainhira sira sai vítima no sente la seguru bele ba aprezenta an no VPU bele fó asisténsia nune’e mós fasilita asesu ba justisa,” nia dehan.
Enkuantu nia dehan, totál orsamentu ba konsturasaun uma tolu ne’e kada uma iha montante rihun $60,000 no nia media 11,5x12,5. Aleinde ne’e husu atu bele UNDP kontinua nafatin konstrui uma seguru ba VPU iha munisípiu sira atu bele fasilita atendimentu ne’ebé seguru ba vítima vunerabilidade sira.