Quinta, Junho 13, 2024
Total visitors: 766366

Komandante Unidade Polísia Vuneravel (VPU) Nasionál, Inspetór Ricardo da Costa dehan, durante ne’e VPU munisípiu Ermera rejistu kazu insestu hamutuk 20 no prosesu ona ba tribunal.

Komandante Unidade Polísia Vuneravel (VPU) Nasionál, Inspetór Ricardo da Costa dehan, durante ne’e VPU munisípiu Ermera rejistu kazu insestu hamutuk 20 no prosesu ona ba tribunal.

Nia dehan, kazu insestu sira ne’e haruka kedan ba Ministériu Públiku atu nune’e bele fó justisa ne’ebé mak justu ba vítima sira.

“Durante ne’e VPU Ermera rejistu kazu insestu hamutuk 20 husi kazu hirak ne’e ita prosesu ona ba tribunal no autór balun iha ona prizaun balun iha prosesu nia laran,” nia hatete.

Nia dehan, kona-ba vítima sira-ne’ebé mak iha trauma nia laran, VPU servisu hamutuk ho Uma Mahon sira hodi fó asisténsia ba sira, nomós fó formasaun nune’e sira bele sai husi trauma nia laran.

“Ita-nia vítima na’in 20 ne’e ita rekomenda ba iha Uma Mahon, Alfela, Fokupers, Casa Vida no seluk tan hodi rekupera fali sira-nia hanoin,” Komandante Costa dehan.

Nia dehan, kazu insestu ne’ebé sira rejistu ne’e mak hanesan, aman halo ba oan rasik, maun halo ba alin feto rasik nune’e mós tiun halo ba subriña rasik.

Iha fatin hanesan, Prezidente Autoridade Munisípiu Ermera, Eujebio Salsinha dehan husi dadus ne’ebé fó sai katak munisípiu Ermera mak rejistu kazu sira violénsia kontra feto no labarik feto inkliu kazu insestu ne’e barak iha territóriu laran.

“Ita halo esforsu estraordináriu no ita tau osan, hodi halo sensibilizasaun ba ita-nia komunidade atu bele entende saida mak violénsia kontra feto no labarik feto nune’e mós insestu rasik,” nia dehan.

Iha parte seluk, Xefe Suku Riheu, Postu Admistrativu Ermera Vila, Munisípiu Ermera, Felisberto Soares Madeira Ximenes dehan atu halo redusaun ba kazu refere dadaun ne’e sira estabelese ona atividade spotlight ho parseiru sira husi Fokupers, Rede Feto, hodi tau matan ba feto no labarik nia direitu.

“Komesa ita implementa atividade spotlight ne’e Ermera nia kazu hahú redús ona no sosiadade koñese katak kazu insestu ne’e la merese atu akontese,” nia dehan.

Nia dehan, antes ne’e Ermera rejistu kazu hamutuk 60 maibé ho atividade hirak ne’e iha tinan 2022 ne’e rejistu kazu insestu 20.