PNTL Destaka Membru UEP no BOP Kontrola Negosiante Dalan Nasionál

Komandu Polísia Nasionál Timor-Leste (PNTL) destaka membru hamutuk na’in 45 kompostu husi membrus sira Unidade Espesial Polísia (UEP) no Batalaun Ordem Nasionál (BOP) hodi kontrola negosiante dalan nasionál inklui Elemloi, Bairu-Pite, Kampung-Baru no Bekora tanba sira kontra lei kódigu estrada númeru 6/2003.

Xefe Ekipa Lideradu Primeiru Sargentu Geromano Pereira dehan, ekipa ne’e hodi kontrola negosiante sira-ne’ebé okupa trotoar nune’e mós dalan publiku sira hodi faan sira-nia produtu ne’e kontra lei kódigu estrada nian hodi hamosu engrafamentu nune’e mós bele rezulta asidente

Nia dehan, lei kódigu estrada númeru 6/2003 la autoriza ema okupa trotoar nune’e mós dalan publiku hodi halo negósiu, tanba ne’e komandu orienta hodi deteka membru sira iha fatin hirak ne’ebé sempre okupa faan sasan.

“Trotoar ne’e halo atu ema sira-ne’ebé la’o ain sira hodi movimentu, no dalan públiku ne’e ba transporte, bainhira negosiante sira okupa hotu ne’e kontra lei no tenke prosesu,” nia dehan.

Tanba ne’e nia dehan, dadaun ne’e PNTL destaka ona membru hamutuk na’in 45 hodi bele kontrola negosiante sira.

“Negosiante sira nafatin kontra ekipa destakadu sei kaptura no lori ba prosesu tanba ida-ne’e la’ós foin akontese maibé bei-beik ona sira kontra lei kódigu estrada nune’e mós kontra orden estadu,” Xefe Ekipa Lideradu Primeiru Sargentu Pereira dehan.

Nia dehan, membru na’in 45 ne’e destaka iha área hirak ne’ebé mensiona ne’e kada área iha na’in 10 hodi kontrolu negosiante sira nomós movimentu rodoviária atu labele hamosu engrafamentu iha kapital Díli.

Iha parte seluk, negosiante Daniel do Carmo dehan triste tebes tanba lor-loron polísia no seguransa munisípiu Díli nian kontrola estrada hodi sira labele faan sira-nia produtu hodi sustenta sira-nia moris.

“Ha’u triste tebes tanba produtu ne’ebé ami faan ne’e la’ós ami rasik mak kuda maibé ami sosa fali mak lori mai faan, maibé tanba de’it hetan intervensaun husi parte polísia produtu sira-ne’e ami labele faan no ikus mai aat hotu,” nia dehan.

Nia dehan, tuir loloos sira sei la okupa trotoar leten no dalan publiku hodi faan, maibé tanba deit merkadu ne’ebé governu kria ne’e fatin la sufisiente ba ho ida ne’e mak sira deside faan iha dalan públiku maské sira hatene katak kontra lei.

Enkuantu nia dehan, dalaruma loron ida sira faan modo hetan de’it $4-$5 la liu husi ida-ne’e, osan ne’ebé sira hetan hodi selu oan nia eskola nomós responde nesesidade lor-loron nian.