Polísia Identifika Ona Área Risku Ba Krime Iha Viqueque

Komandu Polísia Munisípiu Viqueque identifika ona área risku ba krime iha Viqueque no koloka membru hodi halo seguransa ba komunidade.

Komandante Polísia Munisípiu Viqueque, Superientendente Sebastião Alves Quintão, dehan dadaun ne’e komandu preparadu ona hodi koloka membru ba fatin sira-ne’ebé mak identifikadu ona.

“Área risku hirak ne’e komandu iha obrigasaun atu bele koloka membru polísia hotu atu halo seguransa ba área identiku sira-ne’e iha munisípiu Viqueque hodi fó seguransa ba komunidade,” nia hatete.

Nia dehan, totál membru ne’ebé atu koloka ba área risku hirak ne’e hamutuk na’in 132, nune’e mós hetan tan apoiu husi membrus F-FDTL nune’e mós Unidade Espesial Polísia (UEP).

“Kona-ba transporte ami sufisiente tanba komandu munisípiu to’o eskuadra sira hetan hotu ona karreta operasaun ida-ida,” Komandante Quintao dehan.

Nia rekoñese katak Munisípiu Viqueque riksu duni ba krime maibé polísia nafatin servisu hamutuk ho autoridade lokal nune’e mós joven sira atu bele halo prevensaun.

“Ita husu ba komunidade bainhira halo movimentu keta tauk tanba polísia prontu 24 oras hodi fó seguransa,” Superientendente Quintão dehan.

Entretantu, Komandante Jerál Polísia Nasionál Timor-Leste (PNTL), Komisáriu Henrique da Costa, dehan polísia tenke fó atensaun ba área risku ba krime sira, atu nune’e kriminozu sira labele movimentu tuir sira-nia hakarak hodi halo krime.

“Ita husu membru sira fortifika seguransa iha área riku hakbesik an ba komunidade hodi bele halo prevensaun,” nia husu.

Nune’e mós husu ba membru sira halo servisu ho neutru atu bele garante estabilidade no garante duni katak polísia nia servisu ne’e hodi atende duni ba komunidade la’ós de’it iha Viqueque maibé ba povu iha Timor-Leste laran tomak.