F-FDTL Husu Governu Australia Moderniza Lian Inglés Ba Militár

Komandu Falintil-Forsa Defesa Timor-Leste (F-FDTL) husu governu Australia atu moderniza lian Inglés ba membru militár sira tanba lian Inglés sai hanesan matadalan hodi ba kumpri misaun pás ONU nian.

Reprezentante Xefe Estadu F-FDTL, Coronel Cesario Salustiano Marçal Ximenes “Haksolok” dehan, durante ne’e governu Australia halo kooperasaun di’ak ho F-FDTL iha área oin-oin hodi kontribui ba dezenvolvimentu militár.

“Ami husu atu moderniza ami-nia forsa sira iha área lian inglés nian, atu ko’alia no rona tanba lian inglés hanesan ami-nia matadalan hodi ba kumpri misaun pás ONU nian ne’ebé organiza husi governu Australia rasik,” nia dehan.

Nia dehan, atu nune’e bele fasilita ba apoiu misaun pás ONU nian tanba lian Inglés mak lian ne’ebé ema uza ba servisu iha mundu, nune’e mós sai matadalan hodi fasilita sira ba apoiu misaun pás iha rai-liur ne’ebé dadaun ne’e sira halo hela treinamentu.

“Lian inglés ne’e esensiál tebes mai ita-nia instituisaun tanba oras ne’e mundu modernu nune’e mós ita halo koperasaun ho nasaun ne’ebé ko’alia lian inglés tanba lian ne’e kuaze mundu tomak ko’alia,” Coronel Haksolok dehan iha Metinaro.

Nia dehan, nune’e mós militár sira labele baruk atu aprende lian inglés tanba sira mak sei ba kumpri misaun pás ONU ida-ne’e presiza tenke hatene inglés.

“Husu ba militár internasionál no nasionál sira-ne’ebé hanorin lian inglés ba militár sira, ha’u husu atu bele hanorin tuir sistema no lalaok ne’ebé mundu modernu aplika, nu’udar militár ne’ebé mak profisionál,” nia husu.

Aleinde ne’e liuhusi kooperasaun governu Australia liu-liu Kooperasaun Programa Defesa nian ne’ebé durante ne’e apoiu ona formasaun lian inglés ba forsa Timoroan na’in 10 durante fulan 18 iha metinaro ba oin ne’e sira bele moderniza tan lian inglés ba militár sira.

Iha fatin hanesan, Australian Deputy Defense Attaché Commandant Brigette Jensen dehan, programa lian inglés iha Metinaro, Baucau no Hera sai hanesan, pilar prinsipál husi programa Koperasaun Defesa Australia ho Timor-Leste nian.

“Lian inglés importante tebes tanba utiliza iha mundu iha parte seluk mós ba apoiu seguransa marítima nune’e mós apoiu pás nune’e mós iha tarrefa seluk apoiu seguransa no estabilidade iha Timor-Leste,” nia dehan.

Tanba ne’e nia dehan, programa lian inglés ne’ebé mak sei oferese ne’e foku mós ba tópiku militár no perspetiva internasionál nune’e eleva F-FDTL hola parte iha operasaun militár multilaterál sira.

Tanba ne’e nia dehan, Australia orgullu tebes atu apoiu programa lian inglés liuhusi programa Koperasaun Defesa nian hodi apoiu formasaun lian inglés ne’ebé mak sistemátika ba militár sira.