Sexta, Março 29, 2024
Total visitors: 766366

Komandante Jerál Polísia Nasionál Timor-Leste (PNTL), Komisáriu Henrique da Costa ho Segundu Komandante Komisáriu Pedru Belo iha sira-nia mandatu identifika ona servisu prioridade lima iha sira-nia mandatu hodi dezenvolve intituisaun.

Komandante Jerál Polísia Nasionál Timor-Leste (PNTL), Komisáriu Henrique da Costa ho Segundu Komandante Komisáriu Pedru Belo iha sira-nia mandatu identifika ona servisu prioridade lima iha sira-nia mandatu.

Komisáriu Costa dehan, servisu prioridade liman ne’e hodi mellora jestaun instituisaun no atividade sira nune’e bele halo dezenvolvimentu instituisionál.

“Prioridade lima ajusta estrutura PNTL tuir lei orgánika no estatutu PNTL, implementa sistema promosaun hodi promove ekuidade no diversidade tuir deviza hotu, dezenvolve rekursu umanu hodi apoiu profesionalizmu, promove partisipasaun feto iha pás no seguransa, no estabelese Institutu Superiór Siénsia Polisiál no Polísia Akadémika,” nia dehan.

Nia dehan, servisu prioridade refere todan no presiza servisu makas atu nune’e bele implementa ho susesu nune’e bele lori dezenvolvimentu ba instituisaun PNTL.

“Ami fiar katak servisu iha ekipa no parte hotu iha governu, komunidade, sosiadade sivíl no parseru sira hotu ita sei ultrapasa obstáklu sira nune’e bele hametin lei no orden hodi proteje direitu no liberdade iha nasaun furak ida-ne’e,” Komisáriu PNTL Costa slienta.

Tanba ne’e nia dehan, programa prioridade hirak ne’ebé sira iha hodi mellora atendimentu ba públiku nune’e mós hasa’e vizibilidade iha públiku la’o ain ró no rai-maran.

Entretantu, Vise-Ministru Interior Antonio Armindo dehan, governu sempre apoiu programa servisu hotu ne’ebé polísia iha liu-liu hodi halo dezenvolvimentu seguransa ba rai ida-ne’e.

“Nasaun no povu ida-ne’e atu moris hakamtek ne’e seguru presiza prezensa polísia iha komunidade nune’e mós dalan públiku sira hodi fó seguransa,” nia hatete.

Tanba ne’e fiar katak komanadante PNTL foun na’in-rua ne’e bele hadia fali naksalak ne’ebé la konsege rezolve husi komandante jerál sesante nune’e mós kontinua servisu sira-ne’ebé mak seidauk konsege finaliza.

“Lori governu nia naran hato’o parabéns ba Komandante Jerál PNTL foun na’in-rua no hato’o mós agardese ba kolaborasaun no kontribuisaun husi komandante jeral sesante na’in-rua,” nia dehan.

Husu atu implementa programa prioridade hirak ne’e atu bele halo dezenvolvimentu ba polísia.