SM Kaptura Sidadaun Estranjeiru 42 Iha RAEOA

Servisu Migrasaun (SM) kaptura sidadaun estranjeiru na’in 42 ne’ebé servisu ilegál iha Rejiaun Administrativu Espesiál Oé-cusse Ambeno (RAEOA).

Diretór SM, Luis Soares Barreto, dehan sidadaun estranjeiru sira-ne'e identifika sira halo servisu kona-ba konstrusaun fíziku iha Suku Lifau, Sub-Rejiaun Pante Makasar, RAEOA, ho ilegál tanba la utiliza vistu traballu.

"Ita kaptura sidadaun estranjeiru na’in 42 tanba sira utiliza vistu turista hodi halo servisu, ida-ne'e ilegál, kontra lei," nia dehan.

Nia dehan, sidadaun na’in 42 ne'e, sira na’in 38 husi nasaun Indonézia halo kontrusaun fíziku ho ilegál no na’in 4 husi Xina halo atividade negósiu loke loja ho ilegál.

"Sidadaun hirak ne'e ilegál tanba tuir lei azilu migrasaun númeru 11/2017 katak sidadaun estranjeiru labele utiliza vistu turista hodi halo servisu iha Timor-Leste," Diretór SM Barreto dehan iha knaar fatin Vila-Verde.

Nia dehan, ba ema estranjeiru ne’ebé hakarak tama ka hela temporariamente hodi halo atividade turizmu, negósiu no vizita família ruma, lei la fó dalan atu halo servisu iha Timor-Leste tanba ida-ne'e krime.

"Lei fó kompeténsia ba Servisu Migrasaun hodi halo nia funsaun hodi halo kapturasaun no submete ba prosesu atu nune'e bele deporta fila sidadaun hirak ne'e ba nasaun orijen," nia informa.

Tanba ne'e nia dehna SM nafatin esforsu hodi buka tuir sidadaun estranjeiru ne’ebé uza vistu turístiku hodi halo servisu fíziku iha Timor-Leste.

Entretantu, Diretór Fundasaun Mahein (FM), Abel Ximenes, dehan sidadaun estranjeiru labele servisu konstrusaun sira tanba Timoroan mós bele servisu hanesan, tanba ne'e, sira-ne’ebé servisu ilegál ne'e tenke haruka fila ba nasaun orijen.

"Ita labele husik livre ema estranjeiru servisu ilegál iha Timor-Leste tanba ne'e kontra lei nune'e mós taka dalan ba ita nia joven sira asesu ba kampu servisu," nia dehan.

Nia dehan, kazu ida hanesan ne'e la’ós foin akontese maibé bei-beik ona, tanba ne'e governu liu husi servisu migrasaun tenke sériu kontrolu asuntu sidadaun estranjeiru servisu ilegál iha Timor-Leste.