Domingo, Abril 21, 2024
Total visitors: 766366

Governu Australia liuhusi kooperasaun Forsa Defesa Australia apoiu ona Ró Bordes 6 ba Falintil Forsa-Defesa Timor-Leste (F-FDTL) Komponente Naval Lizeira hodi fasilita treinu fuzileiru hodi aban bainrua salva-guarda zona tasi Timor-Leste nian.

Governu Australia liuhusi kooperasaun Forsa Defesa Australia apoiu ona Ró Bordes 6 ba Falintil Forsa-Defesa Timor-Leste (F-FDTL) Komponente Naval Lizeira.

"Ró Bordes 6 ne'e utiliza hodi halo treinamentu fuzileru sira nune'e mós halo salva-guarda ba ema ne’ebé mak mout iha tasi nune'e bele uza ba halo mós atuasaun iha tasi," Komandante Komponente Naval, Kapitaun Mar no Guerra Higinho das Neves dehan.

Nia dehan, ró refere mós bele utiliza hodi halo atuasaun ba atividade ilegál sira iha tasi.

"Bordes ne'e opera rasik husi ita-nia membru naval rasik ne’ebé mak durante ne'e tuir formasaun kona-ba opera ró iha Australia," Komandante Neves dehan iha Baze Naval Hera, Dili.

Tanba ne'e nia agradese tebes ba governu Australia liu husi koperasaun Forsa Defesa Australia ba apoiu ida ne.

Iha fatin hanesan, Reprezentante Ministru Defesa, Diretór Nasionál Jestaun Patrimóniu Francisco Brites, agradese ba buat hotu ne’ebé governu Australia apoiu.

"Husu ba parte Naval utiliza ho kuidadu tanba apoiu ne'e bele foti ita-nia rain Timor-Leste katak ita mós bele uza ona ekipamentu modernu ne’ebé nasaun avansadu sira fó mai ita," nia dehan.