- Publika iha: 13 Março 2023
Komandante Unidade Apoiu Servisu (UAS), iha Falintil-Forsa Defesa Timor-Leste (F-FDTL), Major de Engeñaria Gergorio Soares, dehan UAS kuntinua esforsu hodi hadia kualidade membru unidade sira nian hodi bele halo servisu ho profesionalismo tanba sira ba militar maibe halo mos atendimentu ba dezastre naturais ne’ebe mak komunidade sira infrenta.
Nia dehan, durante ezistensia UAS, ba dala 14 ona maibe buat barak mak sei falta hodi kontribui ba kualidade no profesionalismo membru sira nian inklui ho ekipamentu, rekursu humanu, komportamentu, disiplina, no kapasitasaun.
“Ita kuntinua esforsu hodi hadia kualidade membru sira nian liu husi hametin ambiente servisu ne’ebe mak diak, kompleta ekipamentos, kapasitasaun, nune’e mos husu sira tenke disiplina, nune’e ita bele atinje nia profesionalismo ba membru F-FDTL, atu bele hala’o kanar ho diak ba povu no nasaun,” nia dehan.
Nia hatete, atu atinje profesionalismosignifika katak akumula hotu, matenek, kapasidade, kumpri regras sira ne’ebe mak regula F-FDTL.
“UAS nia servisu la’os deit apoiu komponente no unidade sira iha F-FDTL maibe mos halo atendiemntu ba dezastre naturais, nune’e apoiu komunidade sira ne’ebe mak presija ita nia tulun konaba servisu ruma, tanba ne’e ita nia membru sira tenke iha kualidade nune’e bele servisu ho profesionalismo ,” Komandante Soares dehan.
Nia informa UAS ne’e mos halo servisu hanesan, protesaun sivil, banhira governu ka sivil ruma husu apoiu ho autorizasaun husi komandu UAS diretamentu tun ba terenu hodi tulun sira.
Iha fatin hanesan, Reprezentante Xefe Estadu Maior (F-FDTL, Kapitaun Mar no Guerra Joao Silva dehan membru sira tenke disiplina, hala’o sira nia knar ho profesionalismo nune’e bele apoiu komponente operasional terestre, naval, no areo atu sira bele halo tuir lei hatete.
“Maibe ita rekoñese katak ekipamentos no materias no rekusru humanu ba unidade ida ne’e sei la sufsiente liu atu bele fasilita sira servisu ho profesionalismo,” nia salienta.
Maibe nia dehan, ho lei programasaun militar ne’ebe mak diskute dadauk ne’e, importante liu ba kompleta meius ekipamentos no materiais, nune’e mos meios humanus atu bele apoiu F-FDTL tomak.
Enkunatu nia dehan, F-FDTL la’os hare deit ba forsa maluk maibe nia tenke partisipa iha halo misaun importante rua hanesan, operasaun militar no operasaun sivil hanesan apoiu kontrusaun sira, apoiu dezastre naturais, tuir kapasidade ne’ebe mak naton.