- Publika iha: 10 Fevereiro 2023
Membru rekrutamentu foun 2022 nian hamutuk na’in 600 halo ona juramentu ba Bandeira Nasional Timor-Leste hodi ofisialmente sai ona membru Falintil-Forsa Defesa Timor-Leste (F-FDTL) hodi serbí nudar lutu ba povu no nasaun.
Xefe Estadu Maior Jeneral F-FDTL, Tenente Jenerál Domingos Raul Falur Rate-Laek hatete, membru na’in 600 ne’ebé halo juramentu komandu liuhusi komisaun rekrutamentu, rekruta iha fulan agustu 2022, sira pasa iha teste, no hahu tama Sentru Instrusaun Prezidente Nicolau Lobato, iha Metinaro, Dili, iha 22 setembru 2022 hodi tuir treinamentu militár nian.
"Ohin membru rekrutamentu foun na’in 600 ne'e ofisialmente halo jurametu ba Bandeira RDTL hodi sai loloos membru F-FDTL hodi serbí povu no nasaun," General Falur dehan.
Nia dehan, membru na’in 600 ne'e kompostu husi feto na’in 66 restu na’in 534 mane, maibé iha treinamentu durante ne'e feto mane treinu hanesan de’it tanba militár feto mane servisu hanesan de’it," nia salienta.
Nia husu ba membru foun sira nafatin halo tuir orden komandu nian, no banati tuir eroi sira, tanba sira mak sai lutu ba nasaun hodi asegura povu no rai Timor-Leste.
Enkuantu nia dehan, membru F-FDTL foun hirak ne'e sei koloka ba komponente no unidade sira, tuir lista ne’ebé mak konsellu ministru fó sai ona.
Iha fatin hanesan, Ministru Defesa, Filomeno Paixão de Jesus dehan, durante nia mandatu halo ona rekrutamentu ba membru foun F-FDTL iha rekrutamentu 2021 (600) no 2022 (600) hamutuk na’in 1200.
"Kona-ba ekipamentu ba membru foun sira rekrutamentu tinan 2022 nian ne'e prepara hotu ona, ohin ita haree sira komesa utiliza hodi halo juramentu Bandeira hodi hatuur loloos sira-nia estatutu katak komesa ohin ba oin sira sai ona membru F-FDTL," MD Paixão dehan.
Tanba ne'e nia dehan tenke mantein disilpina tuir saida mak hetan durante iha formasaun, respeita orden husi ierarqia no hadomi povu no estadu no sai ezemplu ba joven sira iha rai laran.