- Publika iha: 10 Fevereiro 2023
Komandante Polísia Tránzitu Munisipiu Díli, Inspetór Domingos Sarmento Gama, dehan durante fulan janeriu sira kontribui reseita ba kofre estadu hamutuk $38,000 resin ba kofre estadu.
“Reseita ne’ebé kontribui ba kofre estadu ne’e mai husi atividade pasa revista ne’ebé mak polísia tránzitu sira realiza iha dalan públiku iha kapitál Díli durante fulan jeneiru,” Komandante Gama dehan iha knaar fatin Caikoli Díli.
Nia dehan, iha atividade pasa resvista ne’e halo aprensaun ba viatura hamutuk 659 kompostu husi motorizada no kareta, mak komete iha infrasaun ho nune’e polísia aplika multa administrativu hodi selu iha banku, tanba viola kódigu estrada, lori motorizada la uza kapasete, la iha asesórius-motor nian, la monta xapa matrikula, no laiha karta kodusaun.
“Evidénsia ne’ebé ita prende asegura hela iha komandu polísia munisípiu Díli no sira-ne’ebé selu hodi foti fali sira-nia motorizada ka kareta hamutuk na’in 247 seluk seidauk foti tanba seidauk selu multa iha banku,” nia informa.
Entretantu Motorista Mateus da Conceição dehan, hanesan sidadaun tenke kumpri lei no orden banhira komete iha infrasaun hakarak ka la kohi tenke kumpri, tanba lei kódigu estrada ne’e la’ós foin implementa maibé kleur ona, no kolega kondutór no motorista sira seluk mak la kohi kumpri.
“Sira lakumpri polísia iha kompeténsia hodi aplika multa tuir valór ne’ebé mak iha tuir infrasaun ne’e sira komete, ha’u ko’alia hanesan ne’e tanba ha’u iha ona esperiénsia kona (tilang) husi polísia hakarak ka la kohi ha’u tenke selu tanba ha’u mak sala,” nia saliente iha Colmera.
Tanba ne’e nia dehan hakarak halo movimentu livre iha Díli laran utiliza kareta ka motorizada tenke kompleta dokumentu sira nune’e mós kondús kareta no motorizada tenke respeita sinais tránzitu.