- Publika iha: 07 Fevereiro 2023
Prezidente da Republica, Jose Manuel Ramos Horta, husu atu moderniza Falintil-Forsa Defesa Timor-Leste (F-FDTL) emtermos de ekipamentos, tekniku, armas sira, no formasaun nune’e mos servisu kontrolu atu bele hafasil sira nia servisu.
Nia dehan, tempu to’o ona atu moderniza F-FDTL, atu nune’e bele fasilita sira servisu kontrola iha tasi nune’e halo segursa ba povu no nasaun Timor-Leste ho maneira ne’ebe mak moderu oituan hanesan nasaun vizinu Indonesia nune’e mos Australia.
“Bainhira moderniza ona F-FDTL, ne’e ajuda tebes servisu kontrolu maritima nune’e mos kontrolu iha areo nian hodi asegura riku soin Timor nian,” Prezidente Republica Horta dehan.
Tanba ne’e nia dehan, tempo to’o ona governu atu investe hodi moderniza F-FDTL, presija dezenvolve ba oin labele iha fatin deit.
“Ita hare durante ezistensia F-FDTL ba dala 22 ne’e dezenvolvimentu la’o maibe atu moderniza mak seidauk,” nia hateten.
Tanba ne’e tenke moderniza ezemplu iha marinha sira presija moderniza ekipamentos, lanxa nune’e mos servisu kontrola iha tasi, nune’e mos aero no komponente seluk tenke moderniza tuir nia area.
“Bainhira ita moderniza ona ita fiar katak aktividade peska ilegal mos sei la akontese nune’e mos merkadoria ilegal husi tasi, transaksaun droga sira tanba sira iha militar ne’ebe mak servisu diak liu ho ekipamentu modernizadu sira,” nia hatete.
Iha fatin hanesan Xefe Estadu Maior Jeneral F-FDTL, Tenente Jeneral Domingos Raul Falur Rate Laek dehan, dadaun ne’e halo ona lei aprovizonamentu militar atu nune’e bele moderniza forsas defeza Timor-Leste nian.
“Atu moderniza F-FDTL ne’e laos desizaun hau nia mesak maibe ligado mos ba poder politika sira atu bele moderniza armas nune’e mos bem estar militar nian,” nia dehan.
Tanba ne’e nia dehan, tempu ohin loron ne’e tenke konsentra liu ba iha modos modernu liu-liu iha aero no marinha, dadaun ne’e iha ona autonomia ba modus modernu balun liu-liu iha komponente rua ne’e hodi apoiu servisu kontrolu, konaba ekipamentus hirak ne’e labele mensiona tanba segredu.