- Publika iha: 10 Fevereiro 2023
Polísia Nasional Timor-Leste (PNTL), nia Sentru Formasaun Polísia (SFP) fasilita formasaun ba guarda florestal na’in 46 kona-ba oinsá atu proteje balada no riku-soin Timor-Leste nian.
Komandante SFP, Superintendente Xefe Arquimimo Ramos, dehan guarda florestal ne'e importante tebes atu salva balada no proteje ai-horis protejida sira atu ema labele oho no tesi arbiru.
"Sira presiza formasaun ne’ebé mak diak nune'e sira bele hala'o servisu importante ne'e hodi proteje ita-nia balada no ai-horis sira," nia dehan.
Tanba ne'e mak polísia fasilita formasaun ba guarda florestal hamutuk na’in 46, feto na’in 3 no mane na’in 43 iha territóriu laran.
"Formasaun ne’ebé ita ba guarda floresta sira oinsá mak sira atu halo servisu patrolha no kontrola komunidade sira evita tesi ai no sunu rai arbiru atu labele akontese dezastre rai manas no rai halai iha tempu udan," nia hatete.
Nia dehan, guarda floresta ne'e importante tebes oinsá mak joven sira bele sai mós ajente ho professionál atu garante seguransa ba meiu ambiente atu evita komunidade labele tesi ai no sunu rai arbiru.
"Ita-nia guarda florestal hanesan mós ajente kontrolu ba estadu. Sira bele kontrolu ba buat ne’ebé akontese, la presiza polísia. Sira bele ona ajuda atu halo atuasaun iha terenu," Komandante Ramos hatete.
Iha fatin hanesan, Vise-Ministru Agrikultura no Floresta, Abilio Xavier de Araujo, hateten kona-ba ai horis sira ne’ebé mak lakon kada loron, ne'e kauza balun ne’ebé menus husi seguransa guarda floresta nian.
“Iha tinan 2021, ita halo ona rekrutamentu ba membru guarda floresta hamutuk na’in 50 no iha tinan 2022 rekruta hamutuk na’in 100 hamutuk ho sira uluk ho agora rekruta tan hamutuk na’in 200 iha nivel nasionál, maibé ne'e seidauk to'o atu koloka ba iha terenu,” dehan nia.
Nia haktuir, problema seluk mak kapasitasaun, tanba ne'e mak Ministériu Agrikultura no Peska husu apoiu PNTL hodi fasilita formasaun ba guarda florestal sira, nune'e bele hala'o knaar ho loloos hodi proteje balada no ai-horis sira.