- Publika iha: 17 Janeiro 2023
Prezidente Repúblika Demokrátika Timor-Leste (RDTL), Jose Ramos Horta, dehan Estadu tenke kria kondisaun di’ak ba Falintil Forsa Defesa Timor-Leste (F-FDTL) liu-liu iha Kompontente Naval hodi asegura tasi no riku soin Timor-Leste nian.
Nia dehan, tasi hanesan odamatan estratéjiku dezenvolvimentu tanba hola parte koredór ne’ebé halo konesaun marítima husi Oseanu Indiku, Pasífiku, no hanesan rota marítima importante ida.
"Estadu tenke kria kondisaun di’ak ba Komponente Naval di’ak liu tan atu nune'e bele asegura tasi no riku soin Timor-Leste nian iha tasi," PR Horta dehan iha serimónia aniversário Forsa Naval Lizeira ba dala 21.
Enkuantu nia dehan, tempu ona para estadu promove liutan ekonomia tasi tanba husi tasi bele kria kambu traballu barak ba joven sira hodi bele resposta ba dezempregu ne’ebé tinan-tinan aumenta.
"Ita presiza fó jestaun tasi ho matenek hodi fó benefísiu ba jerasaun sira tuir mai ne'e," Horta dehan iha Naval.
Iha fatin hanesan, Xefe Estado Maior Jeral FALINTIL Forsa Defesa Timor-Leste (F-FDTL) Tenente General Domingos Raul "Falur Rate Laek" hatete durante ezisténsia Forsa Naval ba dala 21 ne'e dezafiu no progresu barak mak sira ultrapasa ona liu-liu fó seguransa iha tasi.
"Durante sira hala'o knaar maské hasoru dezafiu barak, maibé, ida-ne'e la sai barreira ba ita-nia membru sira atu fó seguransa ba tasi hodi asegura riku soin tasi, nian nune'e mós krime organizadu sira ne’ebé mak ultrapasa husi tasi," nia hatete.
Nia dehan, maské no ekipamentu ne’ebé naton, hodi asegura tasi maibé iha limita iha meiu oi-oin hodi hala'o orden no asegura soberania Timor-Leste nian.
"Forsa Naval presiza iha investimentu bo'ot hodi dezenvolve, entermus rekursus-humanu nune'e ekipamentu sira," Tenente General Falur dehan.
Maibé nia dehan, kona-ba rekusus-humanus iha komponente naval sufisiente, no labele dúvida ba sira-nia kapasidade, ekipamentu mak sei menus no presiza kompleta.