Sexta, Março 01, 2024
Total visitors: 766366

Fundasaun Mahein (FM) husu Polísia Nasionál Timor-Leste (PNTL) tenke kriminaliza membru arte marsiais na’in-rua (2) ne’ebé mak utiliza atributu arte marsiais hodi asaltu membru polísia iha dalan, banhira halo hela patrolla.

Fundasaun Mahein (FM) husu Polísia Nasionál Timor-Leste (PNTL) tenke kriminaliza membru arte marsiais na’in-rua (2) ne’ebé mak utiliza atributu arte marsiais hodi asaltu membru polísia iha dalan, banhira halo hela patrolla.

Diretór FM, Abel Amaral, dehan membru arte marsiais ne’ebé mak uza atributu hodi la’o sai ba públiku no ameasa ema seluk, ne’e krime tanba liafuan ameasa ne’e mós krime tiha ona tanba ne’e tenke prosesu tuir dalan legál.

“Ita husu Komandu Jerál Polísia Nasionál Timor-Leste tenke loke prosesu ba membru arte marsiais na’in-rua ne’e, hodi kriminaliza sira-nia aktu krimál ne’ebé hasoru membru polísia ka autoridade seguransa nian,” nia dehan.

Nia dehan, banhira husik de’it, la halo prosesu ba membru arte marsiais, sira sei la iha respeita hasoru autoridade seguransa, ne’ebé halo servisu hodi fó seguransa ne’ebé seguru ba komunidade.

“Tanba ne’e, ita mós husu ba lider arte marsiais sira tau atensaun didi’ak ba nia membru sira hotu atu utiliza atributu arte marsiais tenke iha nia dalan, atu nune’e públiku la bele jeneraliza asaun pesoal husi membruarte marsiais sira ne’ebé hatudu hahalok la di’ak iha fatin públiku,” Diretór FM Amaral dehan.

Nia dehan lider arte Marsiais hotu atu bele kontrola no komunika nian membru sira, atu fo atensaun la bele utiliza atribuitu arbiru iha fatin ne’ebé loloos ne’e la hatudu.

“Ami hatene ita boot sira iha regra entaun husu fila fali ita boot sira tenke aplika fila fali regra sira ne’e ba ita boot sira grupu ida-idak, nune’e membru sira labele utiliza fali hodi asaltu komunidade ka autoridade seguransa hanesan foin lalais akontese iha Lahane ne’e,” nia saliente.

Nia haktuir lider sira tenke kontrola membru sira hodi hatudu disiplina iha asaun hotu, atu treinu, utiliza farda ne’e tenke kuidadu mós, tanba uza fali farda hodi ameasa ema seluk ne’e krime liu-liu ameasa tan autoridade seguransa.

Entretantu, Komandante Jerál PNTL, Komisáriu Faustino da Costa, dehan membru arte marsiais na’in-2 ne’ebé utiliza farda hodi asaltu membru polísia ne’e prosesu la’o ona.

“Ita orienta ona ba komandu polísia munisípiu sira situasaun ida ne’e labele akontese tan, no ita sei la tolera sidadaun atu tula liman ba autoridade seguransa PNTL ne’e sei la akontese,” Komisáriu Costa dehan.

Tanba ne’e nia dehan, toleránsia la iha ba sidadaun sé de’it mak koko tula liman ba polísia, sé nia tulan nia sei submete nia ba prosesu nune’e bele responsabilidade ba aktu krime ne’ebe mak nia halo.