- Publika iha: 24 Novembro 2022
Komandu Jerál Polísia Nasional Timor-Leste (PNTL) la autoriza juventude sira hemu tua iha dalan públiku tanba ida ne’e risku bo’ot ba konflitu.
Portavós PNTL, Superintendente Xefe Arnaldo de Araújo, dehan kazu sira ne’ebé ikus-ikus ne’e akontese tanba joven sira hemu tua iha dalan públiku depois hodi asalta malu, balun konsegue lakon vida no balun kanek.
“Komandu la autoriza joven sé de’it mak hemu tua iha dalan públiku ka fatin públiku sira. Banhira operasaun hetan ita halo kedas kapturasaun hodi mai submete ba prosesu,” nia dehan.
Nia dehan, komandu hatun ona karta despaxu ba komandu munisípiu sira hodi kontrola ema sira ne’ebé mak gosta hemu tua iha dalan públiku hodi halo problema no estraga pás no estabilidade ne’ebé mak ema barak kria ona.
“Ita la iha pontu toleránsia ba joven sira ne’ebé mak hadutu hahalok brutalizmu hodi impede movimentu komunidade nian iha rai doben ida ne’e,” Portavós Xefe Araújo dehan.
Nia husu ba komunidade banhira hetan joven sira hemu tua iha fatin públiku ka dalan públiku tenke informa ba polísia nune’e bele halo kedas intervensaun.
“Ita sei la husik kriminozu ida livre, tanba ne’e sé de’it mak iha intensaun atu kria konflitu ita la iha toleránsia,” nia saliente iha Kaikoli Díli.
Nia dehan, operasaun konjunta hodi kontrola no halo prevensaun ba konflitu sira oras ne’e dadaun komesa la’o ona tanba ne’e husu labele bele buka moras haree tuur hakmatek iha uma halo servisu ka estuda.
Tanba ne’e nia dehan, sé de’it mak kontra despaxu ne’ebé mak komandu PNTL hatun polísia sei halo kapturasaun nune’e mós submete ba prosesu tuir lei tanba ne’e konsidera krime desobidénsia ba orden estadu.
Iha parte seluk Diretór Fundasaun Mahein (FM), Abel Ximenes, dehan violénsia ne’ebé akontese iha estrada públiku hanesan, iha Dare, Bebonuk no Luru-Matan ne’e kauza husi konsumu alkohol.
“Situasaun hirak ne’e tanba lakon kontrolasaun husi polísia, tuir loloos ezisténsia polísia tenke 24 oras iha terenu.” FM Ximenes dehan.
Tanba ne’e FM husu PNTL tenke kontrola seguransa másimu tanba kazu sira hanesan ne’e sei kuntinua nafatin tanba ne’e entre grupu la’ós individuál.