- Publika iha: 18 Novembro 2022
Konsellu Superiór Polísia Nasional Timor-Leste (PNTL) aplika sasaun disiplinár ba membru polísia na’in-rua tanba kazu abandona servisu.
Xefe Inspesaun Jerál PNTL, Superientendente Xefe Carlos Geronimo, dehan membru na’in-rua ne’ebé mak aplika sansaun disiplinár ne’e enkontru Konsellu Superiór nian deside hodi submete ba prosesu disiplinár.
“Liuhusi enkontru Konsellu Superiór ne’e ita deside hodi aplika sansaun disiplinár ba membru na’in-rua ne’e tanba abandona servisu to’o loron 120, ne’e liu ona normál,” nia dehan.
Nia dehan, membru na’in-rua ne’ebé submete ba prosesu disiplinár ne’e, ida submete ona ba prosesu demisaun, ida seluk sei rekolla tan faktu kompletu tiha mak kontinua ba demisaun.
“Ita-nia membru na’in-rua ne’e ho diviza ajente xefe no ajente prinsipál no ida hala’ok knaar iha kuartel jerál Polísia Nasional Timor-Leste (PNTL) ida iha komandu munisípiu,” Superientendente Xefe Geronimo dehan.
Tanba ne’e husu ba membru polísia sira tenke servisu tuir orden ne’ebé mak komandu orienta ona no tenke respeita regra disiplinár, tanba estatutu foun PNTL ne’e la fó toleránsia ba membru ne’ebé abandona servisu liuhusi loron normál.
Entretantu, Prezisente Komisaun B iha Parlamentu Nasional, trata Asuntu Defesa no Seguransa, Deputado Jose Agustinho Sequera Somotxo dehan, sasaun displinar ne’ebé mak Komandu Jeral PNTL foti pozitivu tebes nune’e membru sira bele halo servisu tuir ordem hodi servi povu no nasaun ida ne’e iha oras 24 nia laran labele abandona servisu.
“Ita-nia rekursu iha polísia menus hodi destaka ba postu no halo servisu iha kuartel jerál tanba saida mak bele abandona servisu liu fali loron 120 ne’e kontra lei disiplinár PNTL,” nia dehan.
Tanba ne’e nia dehan, aplikasaun prosesu disiplinar ne’ebé komandu aplika ba membru ba membru na’in-rua ne’e nune’e sira bele responsabilidade ba hahalok kazu abandona servisu ne’ebé sira komete.
“Ita husu komandu jerál PNTL labele tolera membru sira ne’ebé baruk-teen hodi kontribui ba dezenvolvimentu iha instituisaun Polísia Nasional Timor-Lese (PNTL” nia sujere.
Nia dehan, ba futuru membru ne’ebé komete iha kazu krime ka abandona servisu tenke submete ba prosesu disiplinár no kontinua ba demisaun.