Quinta, Dezembro 08, 2022
Total visitors: 692025

Ekipa Guarda Florestal husi Ministériu Agrikultura no Peska (MAP) liuhusi servisu opersaun konsegue prende kilat-manu hamutuk 9 husi munisípiu tolu Viqueque, Lautem, no Baucau tanba kasadór sira utiliza hodi kasa animál fuik.

Ekipa Guarda Florestal husi Ministériu Agrikultura no Peska (MAP) liuhusi servisu opersaun konsegue prende kilat-manu hamutuk 9 husi munisípiu tolu Viqueque, Lautem, no Baucau tanba kasadór sira utiliza hodi kasa animál fuik.

Xefe Departamentu Guarda Florestal, iha MAP, João Dasi Mau dos Reis hatete, kilat-manu ne’ebé mak ekipa sira prende ne’e banhira kasadór sira utiliza hela hodi oho animál fuik hanesan meda, lekirauk, manu kakatua, manu falur, loriku, no animál fuik sira seluk tan ne’ebé mak protejidu.

“Kilat-manu ne’ebé mak ita prende liuhusi servisu operasaun ne’e hamutuk 9 husi munsípiu tolu Viqueque ita prende 2, Lautem 5 no Baucau ita prende 2, no kilat hirak ne’e ita entrega ona ba komandu PNTL kada munisípiu,” nia hatete.

Nia dehan, kilat-manu hirak ne’e entrega ona ba komandu PNTL munisípiu sira hodi halo investigasaun ba pesoál ne’ebé mak uza arma hodi estraga animál protejidu sira ne’ebé mak moris iha ai-laran.

“Ami ekipa nafatin halo operasaun kada munisípiu hodi prende kilat-manu sira ne’ebé mak komunidade sei kontinua subar hodi estraga animál fuik,” Xefe Reis informa.

“Ita sei rekolla hotu kilat-manu sira ne’e ho ita entrega ba polísia hodi kontinua prosesu tuir dalan legál tanba ne’e krime arma-branka,” nia dehan.

Entrertantu, Portavóz PNTL, Superientendente Moizes Ximenes, dehan lei numeru 05/2017 tama em vigór PNTL implementa kedas kona-ba krime arma-branka hodi halo ona sosializasaun ba iha munisípiu sira hotu hodi husu ba komunidade balun ho voluntáriu entrega ona kilat-manu ba PNTL, maibé ema ida rua kontinua subar hela hodi oho balada fuik.

“Ita hasai ona avizu ida ba iha komandu PNTL munisípiu sira no ita servisu hamutuk ho guarda florestal sira bainhira identifika komunidade uza kilat-manu halo kedas aprensaun mak lori mai ita prosesu tuir lei,” nia dehan.

Nia dehan, komunidade ne’ebé mak utiliza kilat-manu ne’e krime arma-branka la’ós utiliza rai de’it mós ne’e krime tanba ne’e tenke prosesu.

“Ita iha ona medida balun hodi hahú rejista sidadaun sira ne’ebé utiliza kilat-manu oho balada sira iha munisípiu ho tenke entrega ba iha estadu hodi evita labele kasa balada protejida,” nia dehan.

Nia dehan, komunidade sira la kontribui atu entrega komandu sei hasai despaxu ida halo operasaun konjunta ida hodi tun ba iha munisípiu tama sai uma rekolla hotu tuir dekretu lei 05/2017 kona-ba arma-branka nian.