Sexta, Dezembro 09, 2022
Total visitors: 692386

Polísia Nasional Timor-Leste (PNTL), liuhusi Unidade Polísia Maritima (UPM) prepara ona membru hamutuk nain 42 ba iha área navegadór nian, hodi utiliza ró halo operasaun tasi laran.

Polísia Nasional Timor-Leste (PNTL), liuhusi Unidade Polísia Maritima (UPM) prepara ona membru hamutuk nain 42 ba iha área navegadór nian, hodi utiliza ró halo operasaun tasi laran.

Xefe Seksaun Formasaun no Treinamentu iha UPM, Primeiru Sarjento Polísia José Manuel Gomes dehan membru navegadór sira refere durante ne’e tuir formasaun kona-ba oinsá halo operasaun ba ró hodi kontrola tasi liuhusi parseria ho program governu Australia nian, Timor-Leste Police Development Program (TLPDP).

"Liuhusu formasaun ne'e, UPM prepara ona navegadór hamutuk nain 42 hodi utiliza ró operasaun hodi servisu iha tasi," nia hatete.

Nia dehan, rekursu ne’ebé mak UPM prepara ne'e mós liga ba estabelesimentu autoridade marítima ne’ebé mak governu planu ona atu kria.

"Ita la’ós prepara de’it membru kona-ba navegadór maibé ita prepara mós sira-nia koñesimentu kona ba lei nasionál no internasionál kona-ba mariña nian," Primeiru Sargento Manuel dehan iha Tibar.

Tanba ne'e nia dehan, UPM iha rekursu naton hodi utiliza ró bainhira estabelesimentu ona autoridade maritima, tanba dadaun ne'e membru hirak ne'e mak utiliza ró UPM nian hodi halo prevensaun ba krime iha tasi.

Iha fatin hanesan, Asesór iha Área Marítima husi TLPDP, Cameron Knight, hatete durante ne'e sira parseria di’ak ho PNTL, liu-liu apoiu iha área rekursu humanu nian ba membru polísia sira.

"Iha UPM ita halo ona treinamentu navegadór ba membru nain 42 oinsá bele utiliza ró, nune'e mós kona-ba lei mariña Internasionál," nia dehan.

Nia dehan, nune'e mós TLPDP hasa'e koñesimentu membru sira-nian kona-ba prevensaun no kombate krime tráfiku droga, tráfiku humanu, terorizmu, pirataria, imigrasaun klandestina no poluisaun marítima.

“TLPDP mai ho hanoin ida katak Timor-Leste nu’udar estadu marítima soberanu iha responsabilidade internasionál hodi fornese seguransa iha tasi laran, entaun formasaun ida ne’e hanesan dezenvolvimentu instituisaun PNTL nian. Ita hatene katak parte importante iha nasaun ida maka seguransa marítima,” nia dehan.

Tanba ne'e nia dehan, TLPDP nafatin fó oportunidade ba oin atu kontinua halo formasaun hodi mellora membru UPM sira sai profisonál liutan.